孖妹缸湖遊：由淺入深學做「空軍」

散戶睇淡後市，除咗可以恒指沽輪及熊證部署外，有啲人仲會沽期指。當投資者睇淡個別股份走勢，可以「借貨沽空」，向市場內持貨嘅貨主借入股票，再喺高價位先沽貨，然後等遲啲價格回落先買貨還畀人，從中賺取差價，做到高沽低買。不過一個唔好彩，股價大幅攀升，就會嚴重損手。

彭：京華山一研究部主管 彭偉新

放大圖片

放大圖片

黃：輝立證券董事 黃瑋傑

高妹： 咁借貨沽空有咩手續o架？

　黃： 程序唔算麻煩，只要喺證券行開個借貨沽空戶口，填張表格交去稅務局，之後畀登記費，當然借之前仲要睇吓貨源係咪充足，確定有貨就可以沽，不過要留意沽貨時只可排沽家隊，唔可以用買家價沽。

祺祺： 開咗沽空戶口後要向稅局交一次性登記費，如果喺除淨前借入股票持有至除淨後，股息歸於貨主所有。市傳散戶借貨息率高達10厘以上，而二三線股按金比例可能會高過藍籌，息率咁高，借貨係咪真係好難o架？

　彭： 散戶要做沽空係有困難嘅，因為要借到貨都真係唔容易，有啲證券行會幫投資者向保險公司等機構借貨，但通常借親都以100萬股咁大手借，唔係10萬股、20萬股咁借，要咁啱其他散戶有興趣借入個別股份先做到，所以散戶可以喺沽空之前問定有冇貨借，如果冇嘅，銷售人員就會話佢知邊啲熱門啲多人借。

高妹： 咁當中有咩風險要留意o架？

　黃： 投資者揸住股票，最壞嘅情況係股價跌到零，但所謂借貨沽空係以孖展形式沽貨，要畀以沽貨額計20至25%嘅按金，如果股價係咁升就會畀證券行Call孖展，理論上股價可以無止境咁升，如果係咁，投資者可以輸得好緊要。

沽貨同時宜做對沖

　彭： 港股於上周四爆升逾900點，上周五再抽高500幾點，喺波幅市下借貨沽空，投資者要有錢頂。一般散戶唔太明白涉及嘅風險，最大問題係以為好似買股票咁，買完之後咩都唔使做，所以我唔建議投資者單邊沽，應該同時以期指及期權對沖。當股市跌幅已經好深，散戶先入場沽貨嘅話，要「捱」嘅機會好大，都係留番喺市況升勢過急嗰時先做好啲。

祺祺：若股價不斷漲，就可能要逼住喺高位追貨平倉，風險都咪話唔大。

　彭： 好似上周四有好多股份倒升，投資者就要補孖展，港交所（00388）要求維持相等於股值105%按金，攞出嚟抵押，如果股價飆升，一補倉就要補到氣咳。除咗要睇貨源係咪充足，借貨期間仲要畀息，唔係話沽就沽，每隻利息唔一樣。

　黃： 一旦借貨後，若貨主要求你還貨，證券行通常會安排你向另一個貨主借貨，咁你就唔使咁狼狽撲貨，真係搞唔掂就要喺市場上買番嚟。仲有遇着股份長期停牌，貨主要拎番啲貨買唔番就煩喇。

高妹： 咁用衍生工具做淡會唔會好啲呢？

　黃： 沽證表現受引伸波幅影響，輪價有時升唔足，另外輪證都受年期嘅條款限制，到期要換過第二隻，但借貨就算畀人追貨，都可以再借，借足一年都得，又唔會受對沖值呢啲條款影響。

　彭： 部分輪證嘅流通量不足，以沽證為甚，每隻股份喺市場嘅沽證都唔夠10隻，買賣差價可能比較闊，另外正股往往要跌7%，沽證價格先開始反映。至於恒指熊證，對沖基金及投機者可能睇準街貨分布，挾個市上重貨區，根本就係打開門戶畀人入嚟，成為「大戶提款機」。雖然借番嚟啲貨唔可以無限期揸，想揸一年可能要分兩次借，但計埋風險同成本，都好過用輪證做淡。

沽空唔會推冧大市

祺祺： 本港唔准無貨沽空，又實行「限價沽空」，但啲人都成日將佢形容為跌市「幕後黑手」，咁講啱唔啱呢？

　彭： 當市況淡靜時，沽空佔整體成交只有約6%，近一兩個沽空數字活躍咗好多，佔港股成交金額動輒超過10%，最高仲去過成17%，雖然所產生嘅沽壓相對大咗，但又未足以拖冧大市。沽空金額高，只係反映市場睇淡股市前景，而唔係構成個市進一步下跌嘅因素。

　黃： 通常大市值嘅藍籌股份、大利淡消息嘅股份都多人沽，二線股就無咁普遍，最近一兩個月，證券行借貨沽空情況活躍咗。沽壓對港股跌市有輕微影響，但唔係主因。

高妹： 雖然有人話增加沽盤會拖低個市，但當沽空金額提高到咁上下，因為大戶好友不斷買上，之前沽空嘅大戶就逼住追貨平倉，股價反而會喺買盤支持下暴升。

例子

投資者看淡現價65元的滙控（00005）走勢，以25%按金借貨，沽出10手股份

交易日（T）需存入股票戶口的按金：65元×10手×400股×25% = 65,000元

結算日（T+2）由股票戶口轉出借貨戶口的金額：

260,000元（沽空所得）+ 65,000元 = 325,000元

當滙控不跌反升至80元，散戶仍要維持相等股值105%的按金

按金比率 = 325,000元 /（80元×400股×10手）= 101%

由於101%低於105%比例，散戶會被Call孖展

你認為今月恒指會終極跌至甚麼水平？

甫踏入有股災陰影的十月，恒指受外圍因素拖累，愈跌愈深。你認為今月恒指會終極跌至甚麼水平？據今期《東方日報》網上民調，截至上周六晚上六點嘅結果顯示，覺得恒指月內會跌到15,000點嘅讀者佔25%，估下試14,000點或13,000點嘅分別有4.2%及25%，33.3%預期港股重挫至12,000點或以下，剩番12.5%認為將見底反彈。

若有料報畀高妹同祺祺或有嘢問，可電郵money.biz@opg.com.hk

高妹、祺祺