市場熱線：一拖估值尚算吸引

英國同葡萄牙多間錢莊被降級，但意大利降級都好少理，錢莊降級已係濕濕碎，因為債務危機已喺CDS同孳息率度反映，降級變咗例行公事，而且假如萊斯銀行出事又點敢唔救？所以全球錢莊股出現報復性反彈，上周五大笨象（00005）升3.88%收報61.6元，相反祖國移動（00941）被狂插3.4%。

挾淡目標萬八樓上

三大中資電訊股下半旗為蘋果教主哀悼，依家剩低最強勢嘅電能（00006）亦跌1.3%。古勝成日話當強勢股都被洗劫時，個市亦開始見底，今次大市反彈同強勢股下跌同時發生，要捉路冇咁易。

技術上，恒指由○八年次按海嘯後低位10,676點，升到一○年下旬高位24,988點合共14,312點，九月初至今，先以裂口跌穿整個升浪的0.382回吐支持19,521點，到前一個星期，連0.5回吐位17,832點亦告失守。傳統上，牛市或者一個經濟向好的地區，每次股市升浪，不能跌穿中長期升幅的0.618支持，即16,143點。上周三期指空軍狂轟，將期指推低見16,139點，但同一時間，恒指去到16,170點經已見底回升，看來16,143這組數字，對大市中線已起到支持作用，港股可能已見了中期重要底部。

恒指升完922點，上周五再升534點，收報17,707點，話咁快已補番17,500點嘅下跌裂口，下個位自然望萬八，但要由低位升超過2,000點至可以挾走班老散淡友，所以古勝將目標價調升到18,200至18,300點。呢兩日二三線股反彈隨時兩、三成，連高危股綠城（03900）都炒高17.8%，真係唔買就走寶，但古勝亦講過自己九七年時嘅買股經驗，即日鮮輸35%打完靶後兩日都可以升凸，總之風高浪急自己要執生。

個別民企股輪流爆，國中（00202）就話有董事跳船啫，瑞年（02010）好人好姐突然被大摩唱衰，將目標價由7元降至1.9元，公司中午發通告話第三季銷售強勁增長，但孖屐下晝插得仲勁，埋單勁瀉26.3%，差唔多中咗大摩目標價，大摩身體力行沽咗3球幾，德銀亦沽兩球幾，但中銀國際大力支持淨買5球。間公司睇落冇問題PE又低，不過插水前股價已唔對路，派中期成績表之後反而唔見回購，民企股零舍多古怪。

發A成事有利H股

和黃（00013）、平保（02318）等股雖然唔夠二三線股咁刺激，但反彈起上嚟都相當和味，使乜博埋啲無名腫毒股？部分股其實基本因素冇變壞，只係跟大隊陪跌，好似第一拖拉機（00038）由11蚊質到4蚊，但耕田唔會因為經濟差而冇人耕，依家回升到5蚊樓上亦係預測PE得7.5倍，亦有耐都未到蟹貨區。

前排大跌原因可能有人驚農機補貼優惠可能會取消，因為今年風電設備、節能汽車同家電下鄉等補貼政策先後玩完，但農機補貼係長期措施，亦冇定到年期，所以未免過慮。而鋼材等原材料成本下降，亦有利公司毛利率上升，公司已申請發行A股，A股嘅發行價會參考H股，一旦成事的話，相信股價應該仲會有回升的空間。

古勝