全球糧食短缺問題嚴重，導致食品價格每年都急升，呢幾年唔少企業甚至國際性金融機構睇準呢個機會，密密買咗唔少農地。
搞開投行生意嘅摩根士丹利喺○六年都加入呢個務農行列，大舉投資75億美元喺烏克蘭買咗四萬公頃的農地，諗住既享受糧食價格升值，又可以受惠埋地價嘅上升。
原來要搞個令到企業賺錢嘅「開心農場」唔係想像中咁容易，大摩個農場業務開始咗無耐，就發生畀人偷走晒啲化肥同殺蟲劑，甚至連啲已經收成嘅小麥都不翼而飛；加上仲要不斷去滿足稅務局、消防同埋警察等各方面唔同類型嘅要求添。
唔單止大摩喺農場生意上頭頭碰着黑，就算係股神巴菲特個仔霍華德‧巴菲特，一早放棄接股神班，走去耕田，都慨嘆好多人根本唔知做農民有幾困難，只係因為農業嘅投資回報，就吸引咗一班唔係農民嘅人盲目加入呢個行列。
喺農業業務唔多好，加上○八年金融海嘯嘅拖累之下，大摩喺○九年中就蝕賣咗嗰個農場。
余絲韻