絲絲講場：許照中六福新Title不再獨立
縱橫股壇40年嘅老行尊許照中，原來佢喺一九九七年已經加入六福集團（00590）做獨立非執董，六福尋日出通告，話由於可影響其獨立性嘅因素有所改變，所以重新委任佢做非執董。由獨立變成唔獨立，可能係因為許照中會提供顧問服務有關。
許生嘅新任期由今年十月一日至到明年三月底止，同時佢亦辭去咗審核委員會及薪酬委員會成員嘅職務，佢之前做獨立非執董就收21萬董事袍金，依家董事袍金改為每年11萬元，同每年6萬元顧問費用。佢亦係港交所（00388）、華南城（01668）等公司嘅獨立非執董。
葉澍堃入局做同事
除咗許生之外，六福亦委任咗前高官葉澍堃做獨立非執董，佢○七年離開政府之後，見得佢最多嘅，就係喺飲食節目，佢講飲講食好有紋路。佢將每年收取30萬元董事袍金。
至於六福嘅其他委任，仲包括由王巧陽及鍾慧冰做執董，李漢雄任非執董。
余絲韻