中華網（08006）喺科網年代紅極一時，但科網熱爆破後，即刻謝咗，佢阿媽CDC集團，係納斯達克嘅上市公司，早幾日向美國法院申請破產保護。原來錢果豐喺CDC集團申請破產保護之前一日「劃清界線」，辭任CDC主席及非執董職務！
絲絲本來唔知錢果豐攞timing攞得咁準，全靠港鐵（00066）及恒生銀行（00011）出通告，錢果豐係港鐵主席，又係恒生董事長，亦係多家上市公司嘅非執董。
港鐵及恒生於昨日傍晚發出通告，交代錢果豐已在CDC申請破產保護之前一日，已經辭去佢喺CDC董事會嘅職務。錢果豐任非執董嘅九倉（00004）及利亞零售（00831）其後亦發出內容相近嘅通告。CDC係本港上市中華網嘅母公司，雖然中華網尋日已經喺通告交代，CDC自願申請破產保護，以便促成架構重組及恢復長期財務健康狀況，並強調此舉不會影響中華網嘅業務運作，但係中華網股價昨尋日急跌12.69%，收報2.2元，而錢果豐目前亦是中華網嘅非執董。
CDC主動申請破產保護，據報係由於其涉及一宗6,540萬美元嘅訴訟賠償，可能令CDC資不抵債而引發嘅。至於CDC嘅前身，喺十二年前以先驅者姿態，到美國上市嘅China.com，而錢果豐更早在上市前已經入股，所以佢同CDC嘅關係都好深。
余絲韻