三林環球（03938）主業係銷售原木木材，亦製造同銷售膠合板同單板；另從事銷售花崗岩骨料、橡膠混合物、膠水、物流服務、發電設備、油棕、物業投資等等。擁有咁先進嘅伐木技術，當然亦會好好利用，所以集團亦提供伐木、駁船運輸、設備同機器修理等輔助項目。日常裝修見到嘅地板、刨花板、門等等，全部都係木製品。加上集團亦銷售膠合板同單板，好明顯完全踩咗隻腳入傢俬原材料生意。
睇番佢嘅業務，原木佔同期收入約四成半，可見三林幾倚賴賣林木所得嘅利潤。三林嘅主要客戶係來自印度同中國，印度佔佢原木出口三成左右，中國又佔三成左右。集團依家主要係鞏固自己現有嘅業務，不斷搵方法降低自己伐木成本。
其他業務，包括有地板產品及家庭產品、廚房櫥櫃等等。佢嘅地板業務做得唔錯，屋企裝修用嘅地板，當然要揀優質貨，以三林咁多年賣地板經驗嚟講，銷售地板呢方面唔會難到佢。集團亦善用大型製品遺下嘅膠材木材，製成各樣家庭產品，絕對係環保嘅先驅——絕不浪費。
集團一一年盈利就增加咗六成幾，市盈率10倍左右。係依家個個地方都講緊風險嘅時局，大家都會好驚間嘢拉閘執笠，你話係咪？三林好就好在作風穩健，債項好少，就算銀行收緊貸款，佢都應該能夠撐過呢個風浪。今時今日，穩陣最緊要！繼續追蹤、出發！
香港大學電子金融服務榮譽助理教授 徐燦傑（作者為註冊持牌人士）