上市公司回饋股東有好多方式，努力做好公司業績，幫公司賺錢係最基本嘅，賺到錢就派息畀股東係另一種，國藝（08228）主席冼國林就諗到送戲飛畀股東，欣賞吓公司嘅製作成果。
國藝嘅業務之一係電影製作及發行，送番自己製作嘅戲票，都好正常，一來股東更加清楚公司用啲錢做咗啲乜，一個唔覺意，可以令套戲嘅入場率高啲。其實同類型嘅橋，其他上市公司都用過，好似港鐵（00066）就送過機場鐵路嘅優惠券畀股東，而呢啲方式用喺零售股就最好，因為股東易啲行使到啲優惠，所以，思捷（00330）、維他奶（00345）、稻香（00573）呢類公司可以參考吓。其他好似地產公司就困難啲，唔通你叫地產發展商送層樓畀股東，又或者叫中石油（00857）送桶油你用咩！
冼國林話，每名股東可以獲送兩張《競雄女俠─秋瑾》嘅電影換領券。
諗番轉頭，佢話拍攝著名歷史人物從來都是件難度頗高嘅事，好彩秋瑾後人中輩分最高嘅百歲老人──秋瑾外甥女王慰慈題詞支持。
余絲韻