普通嘅格價專家，成日要捐窿捐罅幫我哋搵最便宜嘅貨品，咁投行嘅格價專家行超級市場又做咩嘅呢？講緊嘅係里昂嘅分析員，繼上次佢哋喺深圳分別搭地鐵同坐的士鬥快去機場為撰寫公路股報告之後，最新嘅搞作係逛超市，仲要特登去三、四線城市度睇，目的係要揭露一眾食品、零售股嘅競爭力真相！
呢站就嚟到雲南嘅四線城市玉溪市，呢位里昂嘅格價專員一入到大型超市，就畀大大個嘅香腸展銷攤位吸引住，因為雨潤食品（01068）嘅香腸賣得平過另一大牌子三點三元（人民幣‧下同）咁多喎，會唔會拖低雨潤嘅毛利率？睇真啲原來雨潤牌一包九條腸賣九點六元，另一大牌則一包十二條賣十二點九元，除番開大家其實差唔多價錢，用包裝嚟做出較抵買嘅感覺，抵讚。
分析仲話，雨潤近期嘅前線產品銷售有所下跌，但仍然肯畀錢去將產品放喺貨架最當眼嘅位置，所以畀雨潤「跑贏大市」嘅評級，目標價十港元，係基於一一年一點一倍嘅帳面值計算出嚟。
行完香腸攤位，就去咗廁紙貨架，恒安國際（01044）某個牌子嘅廁紙就平過維達國際（03331）嘅一成半咁多，但恒安嘅盒裝紙巾就貴過最貴嘅對手兩成。分析員解釋，係因為恒安嘅盒裝紙巾市佔率達三成三咁多，所以定價可以較為進取；而維達就因為做緊產品重組，去改善整體產品嘅平均毛利率，所以就推高咗廁紙嘅定價。
下次去行超市，唔知又會唔會學呢位格價專員咁，睇埋邊隻股票具競爭力，邊隻股票抵買嘞。
余絲韻