市場熱線：魚缸莫財溫水煮蛙

穿咗萬七就睇萬六，依家已好有股災feel，好多人講緊期待「終極一跌」，但似乎尋日未符合條件，一來成交764億元唔算多，二來孖屐未有恐慌，低位買盤依然唔少，而散戶亦跌到麻木晒，似係溫水煮蛙多啲。終極一跌可能要等希臘破產至出現，希臘承認今年同出年都未能達成削赤目標，如果歐盟唔批新貸款嘅話，最快今個月就會扯白旗。歐盟可能攞80億歐元用錢買時間，因為希臘破產之後，其他歐豬息率亦會抽高，真係救又死、唔救又死。

不務正業終炒出禍

市傳溫州資金沽貨回國保駕，實際承認嘅得2億元，但溫州佬炒得狼係人都知，由「中投三寶」開始一路都入佢數，今次溫州老闆集體走佬咁大鑊都係不務正業出事，借錢炒股炒樓炒金炒蒜，市況逆轉加上資金鏈斷裂、歐美聖誕定單乾塘，古勝驚住中資沽貨潮有耐未完，所以建議各位中長線投資者唔好衝動住。

雖話祖國水喉班資回朝，但竟然話黃金周新盤有好多北水掃貨，令人摸不着頭腦。老實講，樓市仍然跑贏股市成條街，講套現能力樓市亦遠遠不及股市，而錢莊正以高息吸定期存款，樓按息率肯定仲有得加，古勝寧願買地主股都好過買樓。

新地（00016）8大商場話黃金周頭兩日人流同生意額都增三成，但今年呢兩日咁啱係周末，所以會較正常為高。不過，黃金周概念股呢兩日跌到冇朋友，濠賭股跌得最慘，英皇鐘錶（00887）尋日亦要插19%，「趴打」（01913）跌12%，經濟轉差咪買奢侈品股，○九年嘅故事咁快又要講多次。

氣氛悲觀少做少錯

亞果（00073）同中綠（00904）兩隻民企食品股有反彈，如果唔托住股價嘅話，隨時冇事都當有事，前者往績PE得3倍，後者得兩倍半兼且息率10厘，睇見人都癲。不過，國美（00493）低處未算低，雖然回頭是岸唔掂房地產，但股價仍先升後插14.7%，巴克萊雪中送炭，叫人增持並睇目標價4蚊。古勝不嬲唔反對人熊市短炒，最緊要識得止蝕，唔好跌咗幾成之後先傳e貓問使唔使止蝕。不過，設一成水位止蝕嘅話，隨時一裂口低開就玩完，同賭馬賭波冇乜分別。

林大（00910）同金威資源（00109）買資產，結果齊齊變輸家，依家一動不如一靜，因為孖屐氣氛悲觀，好事都當壞事睇。銀基（00886）發盈喜一樣插13.3%，甚至本地錢莊發展人仔業務亦被視為風險，而作為本港人仔清算行嘅中銀（02388）因此風險最大，中銀尋日再跌6.2%，但三大公用股仍然硬淨，講息率中銀已高過公用股成倍。

依家博反彈不如博大價股好過，因為大價股估值已相當吸引，好似平保（02318）跌至意想不到咁低價，「高佬盛」幫平保澄清投資富通只係11億人仔，至於市傳會損手百幾億，肯定係空軍作古仔。

古勝