等咗咁耐，大市尋日終於出現似樣嘅反彈，不過見識過之前兇狠嘅跌勢，相信大多數人都只會視之為超賣後的技術反彈，而唔會認為個市已經見底。
化肥股在這次跌市中，同樣被糟質得體無完膚，除咗係市況因素，行業面對成本上漲壓力，前景不被看好亦係主因。以中化肥（00297）為例，雖然中期業績不俗，純利按年升46.01%至4.96億元人民幣，但仍被大行唱淡，關鍵原材料價格上升，令成本按年大增。不過，八月份內地化肥價格承接七月份的漲勢，維持高位運行，尿素、磷肥和鉀肥價環比分別上漲3%、6.7%和5.7%，繼續呈現淡季不淡的情況，相信有助化肥商轉嫁成本壓力。
對比有母公司供應天然氣的同業中海石化（03983），中化肥難免係比較蝕底，但集團已表示有意收購上游業務，不排除短期內有消息公布，為市場提供憧憬。中化肥昨日股價升5.4%，收報1.93元，短線再彈，20日線2.31元為主要阻力所在，支持位睇1.82元。
詩詩