人行行長周小川行將退休，市場一直揣測邊個係接班人，建行（00939）董事長郭樹清一直係呼聲最高嗰個。郭總最近嘅言論，範圍廣闊咗好多，坊間形容佢似乎已經做好再披烏紗嘅準備，絲絲尋日睇過內地《第一財經日報》嘅郭總專訪，已經少講建行，多咗講世界經濟同金融形勢，仲幫中國外儲問題把脈添。
絲絲記得老前輩講開郭總以前係好出名嘅經濟學家，仲做過人行副行長，回巢執掌正印當之無愧。佢近期亦好仔細咁同市場分享佢嘅見解，包括美國狂印銀紙嘅問題，又話希臘已經岌岌可危。
至於人民幣，佢直情話中國完全有條件進行資本項目可兌換，睇嚟對人民幣政策突破引頸以待嘅香港銀行家，有望喺郭總上場之後，睇到人民幣發展再加速。
每個央行行長都有一套外匯儲備嘅見解，原來郭總嘅睇法都好獨特，佢話中國外儲最根本問題係要控制增長速度，提出可以試吓對流入資金提準備金，睇嚟投資者要注意啦。
余絲韻