香港地近年租金飛升，基金公司以往一係唔搬，一搬就「大搬」嘅慣常做法，唔知有冇影響！金管局前副總裁葉約德創辦嘅RAYS Capital近日就靜悄悄地，由律敦治行搬咗去對面街嘅Club Lusitano大廈，係為咗平啲租，定係辦公室環境好啲，就不得而知。只可以話，佢會繼續與全港唯一嘅一盞煤氣路燈為伴。
葉約德喺金管局嘅時候，因九八年金融風暴擊退索羅斯等海外炒家，所以個朵叫「打鱷英雌」，離開星展銀行後，就自立門戶成立對沖基金公司RAYS Capital。地產代理老友話，新舖及舊舖嘅市值租金，都差不多係約六十元一方呎，景觀則見仁見智。新舖就畀都爹利街同雪廠街夾住，你可以話方便啲，但條雪廠街日夜都「車水馬龍」，真係日有日喇叭、夜有夜喇叭，日日都「聽喇叭的日與夜」，嘈到飲咖啡都無味，仲邊有心機計啲股份嘅「內含值」？
絲絲反而就覺得舊舖瑟縮街尾，夠隱蔽靜局之餘，樓下仲係啲ＭＶ、電影、劇集經常取景嘅都爹利街石階「勝地」，情調一流。個人心情靚，隨時睇股票都準啲。不過，可能新舖話晒較新，地方又差不多三千方呎，坐坐下又會習慣咗。
余絲韻