絲絲講場：AIA謝佩蘭認「牛王」
近排股市接連下挫，唔少人覺得係熊市當道，但係友邦（AIA）退休金管理及信託就牛氣沖天，因為佢地有個「牛魔王」──高級副總裁暨執行董事謝佩蘭（Bonnie）。話說尋日絲絲同Bonnie食飯，席間Bonnie提到自己好鍾意食牛扒，屋企雪櫃長期備有牛扒外，亦對食牛好有心得，淨係望吓絲絲切嗰件牛扒，已經判斷到件牛扒嘅質素。
至叻煮牛扒同三文魚
Bonnie身形苗條，但原來佢好鍾意食嘢，閒時走遍大街小巷搜羅美食之餘，仲會親自下廚。除咗烹調牛扒外，煎三文魚都係佢強項。老實講，絲絲對煮嘢食興趣不大，但就好想知Bonnie食極都咁瘦嘅秘密。
當然，有美食之餘都要有胃口。Bonnie透露，佢哋今年強積金嘅客戶數目同規模都有理想升幅，相信Bonnie會有心情大快朵頤。問起近期有乜新搞作，Bonnie話剛剛先新增咗五隻新基金，嚟緊會繼續研究客戶需要，唔排除會增加新基金計劃喎。
余絲韻