利豐（00494）同好多大藍籌一樣，個價跌到阿媽都唔認得，唔怪得佢哋嘅大股東及管理層輪流增持股份。繼副主席馮國綸後，行政總裁樂裕民都不甘後人，喺上個禮拜尾增持利豐股份，下個月就做新郎哥嘅佢，用咗近四千萬增持股份。傳聞佢下個月同歌手李玟嘅婚禮，會使成億元，呢個數係小數目啫。
樂裕民上周四及五，於場內增持共300萬股，每股平均價分別為12.968元及12.485元，涉資3,793.8萬元，持好倉由1.1%升至1.14%。
絲絲記得樂裕民喺今年一月，喺利豐公布業績前，以每股46.4至46.87元（當時未一拆二）嘅價錢，沽售所持有嘅部分利豐股份，持股量由1.53%顯著下降至1.1%。同今次增持個價比較，差咗成倍價錢，準新郎眼光真準！
樂裕民下月就迎娶華人歌后李玟，據聞佢哋想低調啲，但又有好多傳聞出咗，包括婚禮耗資超過一億、佢哋唔畀賓客影相及李玟壓力好大等等嘅傳聞，話明想低調，休想由一對新人把口度證實呢堆消息喇。
絲絲最近睇過一個歌唱比賽，李玟係評判之一，見佢容光煥發，睇嚟都係佳期近，心情靚所致，佢嘅壓力應該冇傳聞中咁大。
余絲韻