市場熱線：亨得利勿過分憧憬

姑勿論係點，尋日有過千隻股票上升，50大升幅全部超過12%，創兩年幾來最大單日升市，但跌到殘嘅股升番一、兩成仍未有耐返家鄉。今次恒指初步目標係回補18,700點嘅下跌裂口，呢個禮拜都會炒住救市措施，憧憬同憂慮不斷循環，今次出到救市基金EFSF槓桿化，所謂針冇兩頭利，標普已警告可能會拖埋德法落水，德國聽日會對擴大EFSF進行投票。

熊市搵食走位要快

鍾意跟風嘅散戶被人形容為羊生羊太，其實基金嘅羊群效應仲犀利，證券報告亦係互相「參考」，總之同行家比較，唔跑輸即係冇蝕底，所以一時捧到天咁高、繼而踩成地底泥，水泥股就係最佳例子。總之孖屐唔係超買就係超賣，大把空倉亦等住補回，熊市仍有好多賺錢機會，但要自問眼明手快，否則唔識走亦係徒然。

跌得多彈得多已經係物理定律，平保（02318）、比亞迪（01211）、中國建材（03323）、中糧（00606）等都大幅反彈，頭一日博反彈可以闔埋眼，但跟住要睇質素，通街都係平股，平保同中糧長線一定唔衰得去邊。

雨潤（01068）尋日略為反彈，但大孖沙狠削隻股嘅目標價，大摩降到得7.4元，細摩亦降到8.2元，而細摩不嬲係雨潤嘅捧場客，就算發生咁多事之後亦不離不棄，出報告唱好之餘兼出手增持，今次可謂愛嘅反面就係恨。

鬼咩！自己管理層17蚊樓上減持完之後發盈警。而公司為免繼續被人在「呃補貼」方面再作文章，未來亦可能會縮減屠宰產能以擴展規模。

蘋果公司前晚逆市下跌，但佢喺香港隻影子股瑞聲（02018）就勁升13%，瑞聲由高位只係回落兩成，喺二三線算係奇葩。「哎瘋5」就快出台，而iPad亦係所向披靡，橫掃所有競爭對手。聯想（00992）最平嗰部樂Pad已減價到1,000人仔，但亞馬遜嘅新平板電腦據聞會以蝕本價發售，實行賺頭蝕尾，博用戶日後訂購佢啲電子書，iPad或者遇到對手。

鐘錶珠寶股尋日亦大幅反彈，三大錶股表現差別幾大，東表（00398）升15.8%、英錶（00887）升8.9%、亨得利（03389）升得3.18%，係人都知經濟差要避開奢侈品股，但祖國同胞夠晒豪，今年「十‧一」放9日假，來港掃貨人數至少增一成，不過彌敦道錶舖已開到多過7仔，好似發行新股一樣攤薄晒。

奢侈品前景存變數

亨得利嘅「海嘯價」係低過5毫子，原因係當年負債高，舊年批股後多咗筆錢，但現金流仍係負數，上半年每股盈利1毫人仔，睇落PE唔算高，但如果奢侈品孖屐前景轉壞，到時十零倍PE都嫌貴。同金股唔同嘅係，錶股嘅角色係代理商，而勞力士係中港有錢佬嘅身份象徵，更係錶行嘅衣食父母，雖然唔使驚被收番代理權，但始終係受制於人，亨得利大股東仲將公司股票抵押畀Swatch經營副業，所以唔值得過分憧憬。

古勝