孖妹缸湖遊：追擊赤色十月

伯老一聲令下要聯儲局開OT（扭曲操作，Operation Twist），唔止粉碎咗對QE3（第三輪量化寬鬆政策）嘅憧憬，仲扭曲埋環球股民嘅面口，我哋落證券行探大家嗰陣，見個個冇晒笑容，好似苦瓜乾咁。

正所謂「上帝要你滅亡，必先讓你瘋狂」，孖妹聽人講，當社會上「魚翅撈飯」或「借錢炒股」普遍，就係股市急挫嘅先兆。當全民皆股，連紐約華爾街擦鞋嘅小朋友，都同你講邊個冧巴抵買，都係股市下跌嘅凶兆。

沈振盈 八七年入行於證券行當見習生，四個月後經歷因程式交易引起嘅股災，精通玄學嘅訊匯證券行政總裁沈振盈又點預測今輪股市凶兆？

林小姐 ○八年大學畢業，金融海嘯期間開始投身社會嘅林小姐，好醒目咁喺○八年樓市低位入市，依家買入嘅單位樓價已飆升六成。

揸住股票收息為上

祺祺：傳統智慧話十月會有跌市，係真唔係呀？

放大圖片

放大圖片

　董： 如果希臘要退出歐元區或者破產，股市一定會跌，點解要等到十月？股災每分鐘都可以發生。投資者唔可以太信呢啲傳統睇法，又好似10天線、20天線呢啲技術分析，有咁多對沖基金，如果佢哋拎100億美元出嚟， 分分鐘可以控制到20天線升跌，圖表走勢係大戶做出嚟，如果跟住行只會中晒圈套。

高妹： 咁呢排跌市又係因為咩原因？

　董：今次因歐洲危機、美國主權評級被降而引發嘅都係第一次，但情況唔算太嚴重。不過我唔信意大利呢個工業國家會出事，我亦覺得西班牙情況已經好轉。

祺祺： 今次跌市同之前有咩相似嘅地方？

　董： 今年情況同○八年金融海嘯一樣，唔係由天災或打仗引起，而港股受歐、美及內地三面夾攻，歐洲壞消息不絕，有啲國家唔爭氣，好似希臘人喺國家危難關頭，仲要因削減工資及退休金罷工。

高妹： 你有冇買股票先？

董： 依家港股好平，但我都冇膽買，我聽到消息到咗18,000點，啲人仲要補空倉震恒指落嚟。有膽嘅可分段買入啲你認為唔會執笠嘅公司。長實（00001）會唔會執笠？我喺八四年當長實股價7元時買咗10萬股，廿幾年年年有息收，我唔理恒指跌到幾多。

祺祺： 董生你經歷過咁多次跌市，最深刻係邊次？

　董： 七三年香港有啲百萬富豪經歷股災後要賣屋，有啲人甚至輸到跳樓。點解唔實際啲，用投資眼光睇邊啲股票適合買嚟收息呢？

第四季港股無運行

祺祺： 從風水玄學角度睇，十月會否衰開有條路？

　沈： 港股到十月底、十一月仲會出現一個大震盪，不過十一月嘅機會高啲。其實恒指喺八、九月嘅跌幅已經好深，依家股災都已經行咗一半，就算十月恒指下跌，空間都會好細。

高妹： 咁整年恒指嘅運程又如何？

　沈： 今年港股八字屬「財多身弱」，即係話股市升幾多就跌番幾多。股友就算搵到錢，都要嘔番晒出嚟，過分進取嘅話仲可能要嘔凸。

祺祺：咁港股十月走勢又會點？

　沈： 喺玄學角度上，恒指十月波幅區間喺17,500至18,500點，而技術上可反彈到19,000點。如果各國冇新政策推出，經濟都應該冇得救架喇，所以我唔會睇好第四季港股表現。長線嚟講，可以喺現價買入中行（03988）、建行（00939），及中移（00941）。

寧買磚頭長線投資

祺祺： 點解你會揀喺○八年置業？

　林： 我喺○七年頭已經開始睇樓，覺得嗰時樓價雖然未跌到「沙士價」，都已經喺低位徘徊。到咗○八年底，我同屋企人喺西環搵到個靚盤適合自住，又見樓價好似重返升軌，於是就以5,000元呎價買入，依家已經升到8,000元。

高妹： 你對磚頭係咪情有獨鍾？依家啲股票咁平，你會唔會買番啲呢？

　林： 股票投資風險較高，我冇時間長期盯住股價走勢，我寧願買金好過，因為黃金嘅蘊藏量有限，相信貴金屬價格波幅冇股價咁大。我嘅風險胃納低，係長線投資者，所以買樓比較啱我。

祺祺：你點睇依家經濟前景？

　林： 發展中國家經濟增長開始放緩，而我覺得已發展國家好似歐美咁，經濟已經陷入衰退，環球經濟非常唔明朗。

你認為恒指今年底目標多少？

港股受外圍因素拖累，恒指年內表現令人失望，投資者入市信心薄弱，利好的則是市盈率已處歷史低位。你認為恒指今年底目標多少？據今期《東方日報》網上民調，截至上周末晚上六點嘅結果顯示，僅13.8%讀者估恒指可重上23,000點樓上，覺得可返到22,000至22,999點有7.6%，16%料年底目標喺20,000至21,999點，11.3%估喺18,000至19,999點，剩番51.3%預期恒指只會喺17,999點以下。

（高妹）（祺祺）

若有料報畀高妹同祺祺或有嘢問，可電郵money.biz@opg.com.hk