市場熱線：好友反攻慎防彈散

瑞銀策略研究報告話，大摩日本以外亞洲指數，八月初至今累跌22%，短短40日時間跌咁多，只曾在九○、九七、二○○○及○八年出現過，市帳率及市盈率跌到1.5倍及9.4倍，雖然未去到○八年金融海嘯時的1.3倍咁極端，但瑞銀的AVM估值模型，去到負1.5。以過去歷史，AVM低於負1，未來六個月有97%機會，股市會高於現水平。

玩撈底嚴守止蝕

期指結算前反彈現象，可以解釋為大戶托高再沽，但呢條攤路已經連續開咗3次，會唔會再咁順攤畀你捉到路呢？九月尾若回升，十月更加唔樂觀，唔少人已講緊十月股災，但大戶最鍾意玩心理戰，年尾先係還債高峰期，大戶可能會折磨多你一、兩個月，十月話唔定會先高後低，總之古勝早就決定作壁上觀。

要博反彈機會多的是，以上周五為例，恒指朝早最多插超過500點，恐慌程度甚至高過上周四跌近千點之時，英皇鐘錶（00887）一度跌穿1蚊關口，睇到古勝都有啲心郁郁，如果夠膽撈底，收市可即賺超過兩成，但風險亦成正比。大上大落係熊市特徵，古勝記得九七亞洲金融風暴開始吹襲香港時，曾有日手痕撈咗兩隻二三線股，當日下晝已跌咗三成幾要止蝕，但過多兩日竟然升返原位有凸。古勝唔反對熊市短炒，但要自問眼明手快兼要識得止蝕。

港股上周五主要跟住美股期指同歐股做人，較穩陣係下晝睇風勢先決定，當時日台韓已經收市，主要戰場集中喺香港同新加坡，見有勢反彈可以過埋夜玩「隔夜鮮」，風險反而低過即日鮮。而香港同南韓呢期做咗跌市雙「熊」，跑輸人哋幾條街。南韓出口股多，跌得多算正常，但港股就衰在流動性高兼沽空容易，所以空軍集中喺香港搵食。

港股沽空仍保持喺一成以上，依家乜底都穿晒，只有每逢500或1,000點當做支持位，其實只係心理關口，「末日博士」話有機會見萬二，到得萬二就有機會見埋海嘯低位萬一。但依家講乜都冇用，因為冇一套合理估值方法，你話雷曼爆煲抑或歐洲淪陷大鑊？

洗倉潮尚未完結

古勝諗起當年港府千億打大鱷何等壯烈，上周五傳社保基金揸住100億銀等入市，100億雖然有好多個0，但只相當於港股一日嘅沽空金額，係A股總市值嘅1/2000，如果100億可以救到市，歐洲同美國就唔使咁煩。但呢類消息總會有人信，滬綜指跌幅亦收窄到0.4%，今個禮拜可能會傳埋取消紅利稅、減印花稅等等。

依家日日都有幾十間公司回購，有啲成功為公司止血，昂納光通信（00877）就由跌買到升，但大部分公司仍然流血不止，當然要睇回購量，中國無線（02369）就係愈買愈低嘅例子，但呢隻股上周五卻好似食錯藥，由低位0.89元突然大升到1.53元，收報1.19元，星展一共買咗16球，乜事咁衝動？

上周五有好多股由低位大幅反彈，上文所講嘅中國無線同英錶唔係個別例子，內房股10連跌之後亦有得彈吓，但等10日先升1日，輸死未得天光。仲有幾日就係「十‧一」長假，每逢呢段時間都炒吓零售股同濠賭股，但呢兩類股因高估值關係，上個禮拜慘遭洗倉。連中糧（00606）都5日跌三成，洗倉潮有洗到食品股迹象，佢姐妹中食（00506）卻算硬淨，但恐防只係時辰未到。

古勝