鍾意走輕鬆路線嘅里昂證券，家陣搞緊投資者論壇。佢哋為今次論壇印嘅場刊，登咗研究部各部門高層對自己負責範疇嘅睇法，表達手法生動有趣，各高層都為自己篇文出番張生鬼相，睇到絲絲好開心，而當中最出位嘅，肯定係里昂中國研究部董事總經理張耀昌嘞，因為居然畀絲絲搵到Francis（張耀昌洋名）嘅「露點相」喎！
雖然份場刊只有八頁，每頁嘅版面啲色彩都好鮮艷，兼有晒好多里昂不同部門嘅阿頭啲得意相片，而Francis嘅「露點相」就刊第六頁。負責中國研究嘅Francis，講吓目前中國嘅發展路向，係好多人都未必搞得清楚嘅「中國特色的社會主義」，就算喺內地長大嘅中國人都未必清楚，正如元老鄧小平所講嘅金句「摸着石頭過河」。佢篇文唔算好長，但張合成相就非常之搶眼。
佢竟然將自己個樣，key咗落一個只穿泳褲嘅男人身上，仲着住對膠拖鞋，同一班人喺沙灘行，望落同當年鄧伯伯帶住成班人，喺北戴河游水嘅相有九成相似。Francis篇文章講完一大輪佢對中國發展嘅睇法，最重要嘅結論就喺張合成相嘅caption（說明）度講出嚟——做分析都要跟步伐，不過要跟其實都唔係咁易o架。
余絲韻