企業網頁靚唔靚係其次，最緊要功能夠齊兼易用。尋日金管局同恒生（00011）都有所行動，講緊嘅喺佢地都為網頁轉轉新形象，特別喺金管局個網頁介面改頭換面之餘，更添加咗唔少新功能。絲絲留意到，金管局成日發現有假網站，唔知今次轉look行動，同假網站有冇關係呢？
絲絲覺得金管局新網頁多咗時代感，版面主色改咗做白色加紫色，功能就加咗「簡易資訊整合」（RSS），登用咗RSS後可以即時接收最新資訊。據講佢哋更附加「自訂網站色彩」、「友善列印」等貼心嘅小功能，亦增加咗《認可機構及本地代表辦事處紀錄冊》，免費畀人查閱。
至於恒生就針對流動裝置，改善咗e-Banking網頁嘅介面支援，標榜個新網頁全面咁支持依家嘅手機同平板電腦，客戶唔使額外下載其他程式，當登入時系統會自動識別上網裝置，等客戶可以用手機上網，都可以享有同用桌面電腦一樣嘅體驗。
余絲韻