絲絲講場：動感主席夫妻愛的故事
好多人話，「愛」係唔可以用金錢衡量嘅。本來一向講求獨立自我嘅絲絲都唔多信；但尋日聽完動感集團（01096）主席蔡秀滿嘅真情剖白後，先知原來夫妻間係可以做到「情比金堅」，令到絲絲對個「愛」字又信多幾成。
變賣嫁妝予夫創業
據講，蔡主席當年下嫁公司行政總裁張文彬時，碰巧遇上一個難得嘅商業發展機會，當年嘅蔡小妹心想既已傾心於張郎，自當為夫君打算，亦無懼傾囊相授；於是，蔡小妹就將整份嫁妝全數變賣後，交付予張郎，以讓兩人共同發展事業。
有情人獲皇天眷顧，最終動感集團搞到風生水起，家陣每年收入「億億」聲，仲有個上市再擴張嘅機會添。蔡小妹當年決定都可算有回報；而當年受其所託嘅張郎，也對愛妻心存感激，自然將妻子放在主席呢個領航位，行政總裁嗰啲「粗重嘢」，就由自己一力承擔啦。
余絲韻