好多人都提倡男女平等，不過原來呢個世界，仲有好多地方唔請女性做嘢。呢個「秘密」係世界銀行嘅報告爆出嚟。有個智利籍女仔，應徵做投資顧問，點知因為性別歧視，依家仲係失緊業。
據統計，女性雖然佔勞動市場已經升至40%，喺低收益嘅行業會高啲，即係話，做管理層或上級嘅女性，比率會低過40%，其中一個原因就係，女性會「被要求」留喺屋企喎。
世銀勸銀行界應該僱用多啲女性，因為女性可以提高生產效率。絲絲覺得，依家銀行界都開始多咗女Banker當家作主，好似國際貨幣基金組織第一位女總裁拉加德，佢話其實一個工作環境，男女數目平衡啲，對做決定都有幫助。
絲絲身為女性，梗係認同拉加德嘅想法啦，其實香港銀行界都有好多女Banker，好似恒生銀行（00011）副董事長兼行政總裁梁高美懿（梁太），仲有今個月啱啱新上場嘅滙豐香港區總裁馮婉眉等。絲絲希望第時無論銀行界，或者其他工作界別，男女都可以得到公平對待啦。
余絲韻