做老闆嘅，要留住員工嘅心一啲都唔易，有啲會用高薪、厚職，又或者大送認股證，要等三幾年至行使到，葉氏化工（00408）就用咗個新方法，各位老闆可以參考吓！
佢哋主席葉志成就同絲絲分享佢嘅經驗，佢會孖住細佬，即係集團副主席葉子軒，同埋細妹，集團另一大股東葉鳳娟，捐出400萬股集團股份，用呢啲股份嘅股息成立一個「葉氏關愛延續基金」，資助有需要嘅員工仔女，作為教育經費，以今年集團每股連同特別股息合計派12仙計，就為呢個基金進帳48萬元，睇番紀錄，集團過去10年無論中期，抑或年終都有派息，雖然48萬元唔算多，但只係個開始，基金慢慢會壯大，真係可以每年都幫到員工喎！
揀依家時候成立基金，係因為葉氏化工成立咗啱啱40周年。葉子軒話，佢同阿哥都好感激呢40年來員工對公司嘅付出，幫公司賺到咁多錢，所以就想趁呢個機會回饋一下員工。個基金主要係用嚟幫助員工嘅子女讀大學，包括香港同內地嘅大學，但係申請呢個基金就需要有入息審查，所以內地員工受惠嘅機會比較大，仲話會日後視乎情況，再將基金嘅受惠範圍擴大，希望更多員工受惠。
余絲韻