市場熱線：青啤展現抗跌力

跌穿萬九之後，好自然會睇萬八，上個月萬八點係淡友嘅目標，但今個月已有人轉睇萬六、萬七。雖然話港股PE得10倍係好抵，但熊市跌到幾倍都唔出奇，十月好有萬聖節氣氛，因為主角會係意大利，孖屐唔驚至奇。今日希臘有筆債券到期，歐盟已將筆緊急貸款延期到下個月，希臘過得初一、過唔到十五。

從近期幾個歐元區央行行長，都表現出各家自掃門前雪的態度，希臘賴債機會未可完全抹殺。尋日幾個「歐豬」國的國債違約掉期，已經全線抽高，西班牙五年國債去到410點子，意大利去到488點子，葡萄牙更升至1,110點子。到底今次希臘危機係小菜一碟，抑或一石擊起千層浪，假如屬於後者，推測落去，最惡劣的景況，係歐洲銀行手上「歐豬」債要大撥備，一旦出現擠提，在資本不足情況下難以籌集足夠資金，演變到國有化收場，到時真係無眼睇。投資者今日唯一可做嘅，就係持盈保泰，盡量減少入市，保留更多現金等市場出現恐慌拋售時執平貨。

入市撈貨多坐艇

奧巴馬話加有錢佬稅，擺明又單挑共和黨，令人諗起提高國債上限嗰次搞到全球大跌市。老實講，有錢佬交稅少過中產的確唔合理，但共和黨必定反對，結果又係政治騷。今日到聯儲局議息，但到聽晚至有結果，依家唔係講量化寬鬆，改咗名做「質」化寬鬆。依家孖屐估聯儲局出乜招數，如果阿伯只係照單奉上不出呢兩、三碟小菜嘅話，孖屐好難收貨。好友當然期望阿伯會有更高招數令孖屐有驚喜，但奧巴馬嘅刺激就業方案比預期泵多一半水，公布後咪一樣插到飛起！

港股尋日成交得536億元，下跌股數過千隻，港股次次跌完都有反彈，但每次撈底嘅都加入坐艇行列，所以成交亦會日漸萎縮。而思捷（00330）係無底洞，三日唔見56%，尋日10蚊都穿埋，市值得番126億元，但未來要用180億元去重整旗鼓，無謂留戀往日風光。滬綜指亦跌1.8%創逾一年新低，中煤（01898）山西煤礦停產，開市一粒鐘狂跌17%要拉閘澄清，但A股冇停牌，收市跌唔夠6%。

銀基老細夠膽識

家電下鄉話分階段結束，要做「農村國美」嘅海爾（01169）跌得最慘，最多插兩成幾低見5.11元，跟住有低吸買盤托番到5.85元收市。其實家電下鄉縮槓有迹可尋，節能汽車同風電設備前排已減少補貼，所以靠攤大手板問阿爺攞錢開飯嘅股要小心啲，因為阿爺隨時會收番。

銀基（00886）逆市創新高，佢老細咁高位都增持，唔通真係有寶？華寶（00336）跌到低位亦有大股東同基金增持，尋日亦係逆市奇葩。

呢排魚缸係咁跌，班上市公司老闆密密手增持，亦有好多公司回購，起碼都會支持信心。不過，雷士（02222）老細喺呢段時間竟然減持，搞到尋日股價大跌17.7%，前排隻雨潤（01068）已係樣辦。

銀基賣酒賣到新高，隻青啤（00168）亦係硬淨股當中嘅表表者，另外雪花啤酒嘅阿媽華創（00291）企到30蚊都唔失禮，究竟經濟衰退、股市大跌，係咪要借酒消愁呢？但青啤今年預測PE仍高達28倍，依家就快10倍PE以上嘅股都嫌貴，青啤唔使被洗倉已經偷笑。

不過，金融風暴其實係一個洗牌過程，中小企或細廠頂唔順要執笠，大廠嘅市佔率就會提高，又或者可以平價收購同業，而原材料平咗亦降低成本。所以，有部分股可以明顯跑贏大市，青啤係其一，另一例子係恒安（01044）。

古勝