錯就要認，輸就要企定。無論長揸定短炒，我一向強調止蝕比止賺重要。唔識止賺可能令你賺得唔夠多，或者沽得太遲由賺變蝕。不過，唔肯止蝕，隨時可以輸到爆廠，一鋪清袋。莫講係散戶，就算係大行交易員也會犯上唔肯止蝕這個錯誤，最新就有瑞銀交易員阿多博里（Kweku Adoboli）。
報道指，阿多博里早於三年前已開始有違規交易和偽造帳目等行為，上星期終被揭發，這位交易員個盤虧損20億美元，差不多等於瑞銀今年第二季的19億美元利潤。
傳媒翻查資料，列舉過去十多年的類似案例，當然少不了九十年代中拖累霸菱倒閉的利森，還有早幾年法興的「魔童」克維爾。傳媒為他們起的綽號都幾有型，例如魔鬼交易員、反叛交易員等等。又嘗試找出他們的共通點，例如都係30歲左右，原本有大好前途，有能力又有野心，似乎想再說明投行中人的貪得無厭。
不過，報道總會淡化出現這些驚天違規交易的最重要元素：輸錢。可有留意到，這些魔鬼交易員都是輸錢收場。到底是公司發現賺大錢的違規交易不會舉報，還是根本沒有賺錢的違規交易？
交易員要做違規交易，搞到偽造帳目，往往因為輸了一次，但唔認輸，再博一鋪，再輸，再博。上司和風險管理部門自不會容許交易員愈炒愈大，最後惟有偽造帳目，暗地裏加大注碼，期望一鋪賺大錢可以填氹，可惜都是失敗居多。
投行交易員也會看錯市，也會輸大錢。身為散戶，認輸止蝕又有何難呢？投資是建立財富，無謂與自尊拉上關係。
大健，財務碩士畢業，投身財經記者行列數年，之後無論轉職歐資投行，抑或現任職英資金融機構，始終情繫中環，相信各有前因莫羨人。
微博：http://t.sina.com.cn/taikin
大健