孖妹缸湖遊：藉着恐慌中贏錢？

二○○八年金融海嘯爆發時期，VIX指數曾經升見89.53點，驚嚇程度爆燈，難怪佢畀市場形容為「恐慌指數」喇，而且每當市況出現逆轉或者大跌時，VIX指數就會用嚟證明市場對後市嘅恐慌或避險情緒，從而推測吓後市發展。今期，孖妹搵到兩位財金專家分析一下呢條VIX指數。

錢：著名對沖基金經理 錢志健

VIX期貨風險大 贏面細

高妹：歐美債務問題衰足咁耐，港股就畀佢哋影響足咁耐，依家恒指郁啲就跌幾百甚至過千點，唔少財演都話要睇住個VIX指數上落，唔知你又有咩睇法呢？

　錢： 八月份美國主權信貸評級被降、歐債危機又升溫，唔少投資者都需要沽貨去補孖展，相反有啲投機者就繼續透過高頻交易（High Frequency Trading，HFT）去做買賣，希望喺波動市中依然搵到錢。而VIX指數亦係一種波幅交易嘅投資工具，投資者可以買賣VIX指數期貨或者期權，但就唔可以直接買賣VIX Cash Index，即VIX指數。依家香港都有「恒指波幅指數」（VHSI），但就未有相關嘅期貨及期權合約買賣，不過港交所（00388）應該好快都會推出。

高妹： 我知道VIX指數變動，係反映投資者對標普500指數往後波幅變化嘅睇法，而唔係反映投資者對標普500指數睇升抑或睇跌，所以就算VIX指數瘋狂飆升，都唔一定代表後市會出現大跌。不過，本港仲未有直接買賣VHSI嘅期貨或期權推出市場，咁我哋可以玩住外國嗰啲先架？

　錢： VIX期貨係由CFTC（美國商品期貨交易委員會）監管，而VIX期權則由CBOE（芝加哥期權交易所）監管，另外仲有隻VIX波幅期權就由美國SEC監管，所以投資者要搞清楚呢幾隻產品嘅分別，因為期貨同期權係由兩個唔同嘅監管機構去睇住風險，所以兩邊嘅孖展唔可以互相運用。　

高妹： 咁佢哋啲玩法又係點計算呢？

　錢： 每張VIX期貨嘅「大期」合約單位係1,000，即係話如果波幅由30上升至31，一張合約差價就係1,000蚊美元；而每張「小期」嘅合約單位就係100，另外VIX期權都係100。雖然外國有好多不同類型嘅VIX波幅指數類型產品，但由於估底嘅贏面實在太細，每當市場一感到恐懼，VIX波幅就會更加嚇人，投資風險一啲都唔細架！

高妹：又係高風險「玩具」，做啱嘅時候就話可以短時間內賺取幾倍利潤，但一睇錯就真係分分鐘輸身家都似，怪唔之得呢類產品多數係對沖基金用嚟對沖跌市風險喇。你係對沖基金經理，孖妹都係留番畀你去玩算喇！

劉：信誠證券投資部經理　　劉兆祥

趁指數滯後 做淡獲利

祺祺：VIX波幅指數同大市有咩關係架？

　劉： VIX指數基本上就係輪商發行人經常提到嘅引伸波幅，用來計算期權同埋認股證嘅價值。而期權計價主要根據資產變化、到期日、利率、行使價同埋歷史波幅去計算。至於本港嘅VHSI同VIX嘅性質無咩分別，只係一個反映標普500指數期權嘅引伸波幅，另一個就係反映恒生指數。雖然我哋仲未有VHSI指數買賣嘅工具，不過投資者依然有辦法去利用呢種指數嘅變化去賺錢。

祺祺： 舉個例子好喎！

　劉： 相信好多散戶都記得八月初港股大跌市架！我就以八月九日大跌市做例子，其實VHSI喺八月五日已急升咗超過12%，顯示市場對恒指嘅恐慌 情緒加劇。如果投資者喺大跌市前即八月八日買咗一張認購期權（Call Option），理論上大市急挫逾一千點，個荷包一定係損失慘重，但部分投資者竟然無輸錢，反而仲有唔錯嘅利潤。點解會咁？原因就係期權引伸波幅大升。不過呢個情況係可遇不可求，近期市況危險，大家炒期權都係小心為妙。

祺祺： 聽你咁講，其實股友可以利用VIX指數走勢，從中預測股市走勢搵真銀，但呢啲係「危險錢」，隨時偷雞唔到蝕揸米喎！

　劉： 其實當市場有大事發生時，通常VIX指數都係之後一、兩日先會有明顯反應，所以散戶都可以趁住嗰兩日去做張認沽期權（Put Option），希望從中可以偷位獲利，不過呢招要小心用之餘，亦要進行得乾淨快手。

你現在的港股投資部署如何？

歐美亂局困擾港股，恒指周一（12/9）曾再失守19,000點。你現在的投資部署如何？據今期《東方產經》網上民調，截至上周末晚上六時嘅結果顯示，36.2%表示「撈貨」，21.4%表示「減磅」，42.4%表示「按兵不動」。

高妹、祺祺

若有料報畀高妹同祺祺或有嘢問，可電郵money.biz@opg.com.hk