市場熱線：優質股調整近尾聲

港股上周五雖然先升後回，恒指最多升超過400點，埋單升得273點，但總算有似啲樣嘅反彈，不過個勢能否持續都係要睇歐美，聯儲局禮拜二同三開會，有冇QE3都係死路一條，但孖屐點樣反應仍係估估吓。至於傳聞中嘅另外兩招只係小菜一碟，對錢莊股尤其不利，例如降低存放聯儲局資金利率想逼錢莊借錢出街，但錢莊寧願大裁員都唔想借出去。

錢莊有錢唔肯借

本地兩大錢莊再加按揭息，上周五尾市懷疑有春江鴨狂沽地主股，樓價仲係大幅領先股市，所以樓價其實仍有幾大下跌空間。今日地主股亦好大機會低開，「4大」喺ADR全跌，新世界（00017）ADR跌逾2%折合8.53元再創新低。

電訊股冇乜力，祖國移動（00941）第3次未能企穩80蚊仲要倒跌，聯通（00762）亦要跌2.32%，但電訊設備股中興（00763）同京信（02342）大升接力。上周五嘅特色係專炒低殘股，包括內房股、航運碼頭股、西部水泥（02233）、秦發（00866）、東岳（00189）等。

不過，低處未算低嘅有思捷（00330）、比亞迪（01211）、中動向（03818）、亨泰（00197）等，呢幾隻股已經輸死人冇命賠，零售股比較簡單，見佢舖頭多唔多人幫襯已可知一二，連件衫都買唔落手嘅話，何況買股？所以話，買股票最緊要睇管理層，上述幾間公司都曾經風光過，所謂「死於安樂」就係咁意思。

徐工上市要拖住，連喺獅城已批准上市嘅曼聯都話睇定啲先，上個禮拜招股嗰幾隻新股先行試水，比較多人睇專業旅運（01235）細細粒容易食，但冇增長概念嘅股只宜短炒。

祖國同胞嘅保有汽車量已經突破1億架，八月份汽車銷量按年升7.3%，對整體車股氣氛好有幫助，因為車市卒之見按月上升，屬於淡季不淡，有車業人士形容為「拐點」（轉角）；踏入「金九銀十」旺季，唔買樓啫，但買車冇問題。

內地車市氣氛好

汽車喺咁多消費品當中仍算穩步增長，調整已近尾聲，舊年有咁多買車優惠，所以基數好高，今年上半年增長減慢其實好正常，第三、四季回升將證明已度過低潮期，係時候要睇番龍頭嘅東風（00489），阿媽公布八月賣車23萬架，按年增12.7%，上市公司未有公布，但應該唔會差。

東風上半年賺少一成，最主要原因係毛利率下跌，但日本地震影響零件供應亦係原因之一，依家零件供應回復正常，鋼價下跌亦減低成本壓力，假如汽車銷量繼續回升，東風上返14蚊附近應該唔難，佢嘅預測PE只係8倍左右，上到14蚊亦只係9倍。

古勝