紅酒、藝術品、普洱茶……甚至海鮮，原來喺大陸都可以成為另類嘅銀行理財產品。絲絲見到有間屬於內地四大銀行之一嘅銀行，最近就推出咗第一款普洱茶投資理財產品，呢度所講嘅當然係稀缺珍貴嘅普洱啦，唔係三叔公同我飲開嘅「地痞」茶居飲嘅普洱茶葉。
銀行會將籌集到嘅錢拎去投資普洱，一年後到期，大家就可以揀收番包靚普洱茶，亦都可以揀現金，最高回報率可以有百分之七，等於一年期銀行定存利率嘅兩倍，大陸咁多人鍾意飲茶，茶莊茶室周圍都係，普洱加理財，聽落有得做！
之不過，凡係投資都會有風險，普洱、紅酒呢啲另類投資產品，承受風險甚至唔會低得過股票等，因為呢啲另類產品係實物，受市場價格影響可以好大，又唔屬於大眾投資產品，流通性唔高，好難話轉手就轉手。行內人不如直接去買餅普洱茶收藏，點解畀銀行插一腳呢？普洱茶都係沖嚟飲算啦！
余絲韻