近排個市好似食咗瀉藥，一路未止跌，港交所（00388）股價亦不能幸免，跌到一仆一碌，但近日港交所都算有番啲開心嘢。話說去年六月至加入港交所嘅首席法律顧問及法律服務部主管黃凱明，被Asian Legal Business選為全年最佳公司內部律師（In-house lawyer），而上市委員會主席高育賢就更被選為全年最佳deal maker（交易撮合者），真係可喜可賀！
有關獎項已有10年歷史，喺行內享負盛名，主要表揚過去一年內，表現突出嘅律師事務所、公司內部法律團隊同deal maker。黃凱明今次攞到呢個獎殊不簡單，要打贏多個強勁對手，包括美銀美林、花旗、摩通、友邦保險、港鐵、野村等嘅代表。
至於高育賢，佢依家係富而德律師事務所中國區主管合夥人，高育賢能夠喺芸芸律師樓大行中脫穎而出，得到deal maker稱譽，真係少啲功力都唔得。富而德近年喺新股等法律方面表現出色。
至於全年嘅債券交易，就由麥當勞發嘅「人仔」債券獲得；股本證券交易就由友邦保險（01299）IPO獲得。
余絲韻