市場熱線：電訊股不容有失

其實尋日個市咁反覆，只不過將呢輪市況縮影到一日發生，尋日靠晒中資電訊股獨力撐起個市，有托住來沽嘅味道，假如大戶完成派貨，連電訊股都開始洗倉嘅話，個市更加冇眼睇。恒指硬淨只係表面現象，二三線股繼續被蹂躪，尋日超過900隻股票下跌，創新低股票不計其數。

短期市況異常反覆

亞洲魚缸尋日幾乎全軍覆沒，早收市嘅日韓台分別跌1至3.5%不等，道指期貨喺1點幾鐘一度跌百幾點，但呢排觀察所得，美股期指根本參考作用好低，如果跟住佢炒上落就死火，亦好容易成為大戶造市嘅工具。到3點歐股開市已係兩個唔同世界，連被「木獨」調低評級嘅法興亦先跌後倒升。

法興降級已事先張揚，孖屐冇乜反應唔出奇，下一單應係希臘今個禮拜筆緊急貸款能否過骨，然後係下個禮拜聯儲局開會，所以呢幾日市況相當反覆，唔想左一巴、右一巴嘅話，最好靠邊站。A股尋日走勢同港股好似，都係先高、後低、再高，滬綜指曾跌近上次低位，然後奇迹反彈，但同港股唔同嘅係，A股上升股數遠多過下跌股數，香港則相反。

至於電訊股點解咁強勢，唯一解釋就係「哎瘋5」效應，「哎瘋」概念尋日亦當道，數碼通（00315）、瑞聲（02018）同富士康（02038）等同升。不過，所謂強勢股嘅下場已見過唔少，最慘烈者莫如水泥股，近期濠賭股同金飾鐘錶股亦相繼淪陷，所以只係時辰未到而已。

呢輪有個怪現象，大股東密密增持，而單睇SDI，機構投資者雖然未話明顯清貨，但係沽多買少。大戶最鍾意有人接貨，大股東亦係當局者迷，見自己間公司正斗就搏命買貨，冇理到外圍環境同大市氣氛。而大股東接貨同公司回購亦有乾塘時候，古勝諗起有間公司老細豪言話歡迎沽空，結果回購好快已玩完。

內地樓市熱錢流走

尋日重災區係內房股，「金九銀十」賣得差，尤其係中秋假期成交慘淡，今次係真跌，唔係假摔，古勝一早話做大耳窿好過炒股炒樓，兼且又限購又限價咁麻煩，熱錢仲唔雞飛狗走至奇，所以香港樓市亦處於高危狀態。

祖國再傳會年尾實施奢侈品減稅，「趴打」（01913）尋日特別醒神，銀基（00886）尋朝亦先升後回，白酒加價成為催化劑，但古勝始終唔敢買代理股做長線投資，尤其係依賴單一牌子。金價仍然企喺1,800美金樓上，但嗰隻中國黃金國際（02099）就無端端大跌咗13.4%，不期然令人聯想起瑞金（00246），之不過，呢隻話晒都係國企中國黃金旗下嘅上市公司嚟喎！

天福茗茶（06868）尋日開始招股，隻股除咗冧把6868好意頭之外，連入場費都係6,868元。而另一新股小南國（01147）夠晒反傳統，入場費4,444元，認真大吉利是。呢排嘅新股冇乜特別概念，睇番已在香港上市嘅同類股已經冇晒胃口。

古勝