昨日是九一一事件十周年，周末看了一齣重演慘劇經過的紀錄片，不期然將世貿中心想像成國金中心……算吧，我想多了。過去十年，發生很多不能忘記的事。就是十星期的事也夠我們震撼。下次再說用三百多億元買股票這個烏龍。因為銀行界炒人才是最貼身的事。
裁員好似未殺埋我身，但大家同坐一條船，多家大行宣布全球裁員，難道對我沒有影響？老闆曾經說，怎會希望競爭對手「摺埋」盤生意，一來多了行家出來搵工競爭，二來自己又少了一個選擇。
人才確是銀行重要的資產，但這種資產只會短炒，不會長揸。○八年金融海嘯後，銀行業績不濟隨即炒人，往往不到半年又話要大事擴充招攬人才。
銀行炒人同炒股票一樣，貫徹快、狠、準原則。你炒股出出入入，發達未必係你，但股票經紀不愁無生意。銀行炒人請人，最開心應該是獵頭公司。
銀行炒人當炒股，員工也要抱炒股心態決定前程。投行派花紅習慣部分比例以股代錢。金融海嘯後以股代錢的比例愈來愈高。近日不少投行股價大瀉，尤其那些歐資行，一手都係銀行股票的投行中人身家大縮水。
若然你眼光準，便可一次又一次大步檻過。我認識一位行家，大約十年前入行，在金融海嘯前兩年轉工，趕及股價大冧前將滿手舊公司股票沽掉，否則身家唔見一半有多。去年又再轉工，剛好等到手上曾變成「蟹貨」的舊公司股票返家鄉，再次在今輪歐債危機前清貨，否則身家隨時唔見一截。
不過，命運是否真的在我手裏呢？
大健，財務碩士畢業，投身財經記者行列數年，之後無論轉職歐資投行，抑或現任職英資金融機構，始終情繫中環，相信各有前因莫羨人。
微博：http://t.sina.com.cn/taikin
大健