孖妹缸湖遊：每逢佳節倍思鄉

伯老講話令市場失望，另一邊萬眾期待嘅美國總統奧巴馬，就話想用4,470億美元挽救經濟同製造就業，雖然佢係孖妹偶像，演說永遠能觸動人心，但我哋對於佢能否成功Walk the talk（言行一致）不抱憧憬，想知自己幾時鬆到綁，都係請教專家同老經驗散戶好過。

黃：豐盛金融資產管理董事　黃國英

愛：師奶股神愛姐

高妹：愛姐手上有冇咩蟹貨等極都返唔到家鄉？

愛：我喺0.148元買咗10萬股天行國際（00993），除權後股價不斷插，用0.03元買咗兩球供股權，嗰6萬元依家得返3萬幾元。我喺滙控80元時買入第一注，跌到60多元我再買，揸得佢就要預佢短期升唔返，不過佢一年有4次息收，當做定期。

祺祺：由金融海嘯後思捷（00330）及國壽（02628）一路未見起色，股價幾時先返到家鄉呢？

黃：揸住就唔好諗住返家鄉，換股好過啦，弱勢股千祈唔好溝，狠心嘅斬國壽同思捷啦。思捷可以話係最難「返鄉」嘅，公司只係一個品牌，冇乜實際資產支撐股價，要睇有冇人肯畀錢收購個brand。

業績唔掂 國壽或需集資

高妹：利豐（00494）可以話係今年散戶嘅傷心股，但「貨不過三日」嘅愛姐，你又點靠佢賺到錢？

愛：我上周又喺13.5元買入一萬股，到14.9元就走，咁就賺咗過萬元，做人要識滿足。利豐實際公司環境冇變，我老公同佢有生意來往，知佢從來唔爭人數，當跌到12至13元不妨撈貨。

　黃： 利豐相對問題細啲，以前佢估值高，覺得同Wal-Mart合作有動力，後來發現潛在動力未必如預期，依家經歷大幅調整，較有機會返家鄉。利豐股價偶然會有20至30%反彈，都係因之前跌得太深。國壽業績令人失望，投資表現又唔見得標青，市佔率好難再提高，我覺得佢有集資壓力。

祺祺：咁短線撈底又可以用咩策略？

黃：有啲股係沽空對象，股價永遠唔知幾時見底。好似比亞迪（01211）之前反彈，因股神巴菲特去中國，唔係有基本因素支持。呢啲股好難擺脫陰跌嘅局面，升勢得兩三日好難捉，然後又跌過。低撈最好等市場恐慌情緒降溫先入市，另要考慮公司盈利穩定性，想像佢喺經濟不景時嘅最壞情況。另可趁非正式傳言充斥，市場恐慌時殺入場，好似之前有人傳法興同法巴唔掂就係想推冧個市，但官方正式公布嘅消息，好似標普下調美國評級咁就值得驚。

愛：呢啲市況唔應該買細價股，而且入市切忌逢低買，「短炒要跟勢，賺蝕冇得計」，當跌穿10天線就要走，執到10至15%就算止賺。仲有新股唔可長揸，10隻新股有8隻都會被人遺忘，你睇西藏5100（01115）之前都好受注目o架。

高妹：有邊啲股值得留意？

黃：雖然依家內地嘅負擔能力唔高，但如果國民收入5年可以升一倍，到時內地人就用得起智能手機，當日後iPhone同iPad喺內地流行到，電訊風氣盛行，中移（00941）及聯通（00762）都會受惠，不過中移仲安全過聯通。電力股都值得睇，中電（00002）打算投資風力發電場，輿論壓力唔大，但准許回報率最高達9.9%，即係話假設中電撥50億元去發展，就可以有近5億元回報。就算要借錢，扣除利息後依然賺到差額，可為公司帶來增長。至於地產股，我睇好九龍倉（00004）同恒隆（00101），九倉旗下嘅海港城及時代廣場出租常具競爭力，而恒隆向來係股價表現出色嘅本地地產股。

愛：我睇好維他奶（00345），係人都要飲佢，只係因冇派特別股息股價一路跌，以前唔會只得5個幾。

黃：買iBond（04208）好似冇大志，但好適合依家嘅經濟環境，唯一缺點係佢得3年期。另外投資者可買貴金屬，仲可以月供領匯（00823），佢喺通脹環境下做街坊生意，唔使點理。

祺祺：股市風高浪急，散戶可以點買保險？

黃：散戶可透過沽期指、買金或認沽期權做對沖，留意咁會降低回報，只適合係危急情況做。不過當市場好恐慌，好似恒指跌到18,800點嗰日，對沖咩鬼吖。做對沖要趁早，如果好似日本地震、美國被降主權評級，新聞炒到第三四日合合，加埋謠言滿天飛令人心虛怯時做，已經好水尾，因為市場氣氛會係極度恐慌後平復。

內地鬆手 恒指上望21000

祺祺：咁港股見底未？

　黃：恒指喺19,000點應該撐得住，市場上冇新嘅利淡因素，最壞嘅情況只係下試上周低位，唯一驚係成交收縮減弱港股支持，依家金融股成為港股嘅死穴，大家要留意滙控走勢。我估今個月港股高位喺20,500點，值得留意嘅係九月下旬聯儲局會議會有冇新消息。

賣月餅好賺過開酒樓？

前兩個月，月餅商已鋪天蓋地咁展開宣傳。明明月餅上架「壽命」好短，何解咁多商家都爭住賣？孖妹訪問過啲餅家老闆，雖說銷售期得一個月，但月餅邊際利潤率奇高，利潤最少有四倍咁多，純利仲等同酒家經營一年！所以話「月餅經濟」係好有趣嘅生意模式，似反映市場「高風險、高回報」嘅傳統智慧。

月餅券黑市市場龐大

內地出晒名中秋節氣氛濃厚，政府為增加庫房收入，向國民開刀徵收月餅稅，想送盒月餅畀員工過佳節嘅老闆可能好心做壞事，打工仔要根據規定交稅。唔少內地人都喺微博批評，唔知會唔會有打工仔還番盒月餅畀老細呢？當好多國民都將收到嘅月餅券喺黑市沽售，涉及金額可能達幾十億元人民幣，又係另一個「月餅經濟」啦！

散戶怕死 唔敢揸貨

「散戶呢排小心咗，以短線炒作為主，賺5至10%就走，喺5%止蝕，股市氣氛好啲嗰時，佢哋會揸兩三個星期o架，依家玩法唔同咗，有啲人買完後，十幾分鐘就沽。藍籌博內銀股，利豐（00494）都有人睇，但保險股就寧願睇友邦（01299）及財險（02328）都唔睇國壽（02628）。」

金融海嘯三周年在即，你的股票投資離家鄉尚有多遠？

○八年九月十五日雷曼兄弟宣布破產，引爆金融海嘯，恒指當年十月最低見10,676點。時至今日，環球市場仍受歐美債務及經濟危機困擾，股市受壓。金融海嘯三周年在即，你的股票投資離家鄉（回本）尚有多遠？據今期《東方日報》網上民調截至上周六晚上六點嘅結果顯示，尚餘五成以上先回本嘅佔47.8%，爭3成見家鄉嘅有26.1%，差唔多回本、就快唔使蟹嘅係8%，剩番18.1%反而有賺。

高妹、祺祺

若有料報畀高妹同祺祺或有嘢問，可電郵money.biz@opg.com.hk