市場熱線：中國水務穩健之選

為着明年的選舉鋪路，上周奧巴馬拋出的振興美國就業計劃，總算有小小意外驚喜，包括增加基建、協助地方政府招聘失業工人，削減薪酬及小型公司利得稅的振興方案，驟眼睇熟口熟面，只係將克林頓、小布殊兩任總統的刺激方案拼拼貼貼，但規模就比傳聞的3,000億美金更大，達4,470億美金，本來市場反應應該比較正面，可惜是執掌過半數議席的共和黨，已經表明唔會支持，搞搞吓，隨時好似上個月有關調高國債上限嘅爭論咁，變成一場鬧劇。

歐豬已到爆煲邊緣

歐洲方面仲大鑊，唱到希臘就快破產，雖然傳言冇乜根據，但人心虛怯，假都被唱到變真，希臘國債孳息同CDS同創歷史新高，短債90幾厘息仲貴過借大耳窿，今次真係死路一條。

港股今日中秋注定「快落」，ADR插591點，假設恒指今朝跌500點左右，跌到19,350點就係恒指小型上升軌嘅支持位，跌穿嘅話可能要萬九點再見。祖國今日放中秋假休市，上周五先升後倒跌，周末公布之新增貸款同八月外貿數據唔差，通脹亦見頂回落，或者可以減輕吓大市壓力。依家港股可謂半死不活，連兩萬點都升唔穿、跌又跌唔落，古勝老早決定作壁上觀，有好股先同大家分享吓，中線則睇住歐洲幾時爆煲。

講番上周五個市，先係朝早七點鐘奧巴馬話使4,470億美金減稅同刺激就業，比原本孖屐預計嘅多一半，但亞洲魚缸全部冇乜反應，恒指高開幾十點；到九點半祖國公布CPI，孖屐又再估中，恒指10點幾企喺兩萬點樓上，但下晝返嚟由升轉跌，恒指收市微跌46點報19,866點。

國壽（02628）烏龍盤事件成為焦點，但竟然不跌反升，可見貨源落喺邊個嘅手至係關鍵，佢同思捷（00330）成為大隻佬升幅榜頭兩位，連衰股都可翻生，反映孖屐冇乜好買。雨潤（01068）亦係有壞消息而反彈，但派完成績表後累計插咗3成，反彈並唔出奇，佢一日劏咁多隻豬得1隻唔合格啫，何況公司係自檢驗出，不過呢類暗箭防不勝防，唔知擔驚受怕到幾時。

水泥股又跌過，中建材（03323）要考驗10蚊關口。上周五有超過50隻股票創52周新低，最輸死人莫過於熔盛（01101），「喼神」（01910）8支陰燭連跌8日，高PE始終抵抗唔到地心吸力，但反而「趴打」（01913）仍升3.4%收報42蚊相當硬淨。

供水量可保持增長

水電油氣股當中，呢排最叻係燃氣股唔使多講，電力股亦威過，祖國CPI回落，自然有人憧憬佢哋就快可以加價，雖然只係一廂情願，但水同電實施階級收費亦係合情合理，等人可以節約用水用電。本地上市嘅水股大部分都係污水處理，主要做供水嘅得中國水務（00855）同上實（00363）旗下嘅中環水務。

中國水務呢排走勢算幾硬淨，其一原因係公司頻密回購，佢雖然唔屬於公用股，但業績穩步增長，管理層早前話下半年有一、兩個城市會加水費，而未來每年供水量會保持雙位數增長，亦會藉收購去壯大。

依家搵隻較為穩陣嘅股票都相當困難，中國水務算穩陣之餘亦有實力。祝各位今日中秋節快樂，但唔好快落！

古勝