絲絲講場：黃錦康愛徒拍美聯廣告
上個月晉升為美聯（01200）董事總經理兼副主席嘅黃錦康，近期曝光頻頻，最新搞作就係正式將中國傳統太極之道，融入集團旗下嘅美聯金融，仲帶挈首位入室弟子、前年奪得「最上鏡小姐」嘅港姐袁嘉敏，做埋美聯金融新廣告嘅女主角。
大讚港姐袁嘉敏勤力
黃錦康醉心修煉趙堡太極內功，早前又上埋電視節目客串表演太極功夫，黃生尋日就同絲絲講，做咁多嘢無非想話畀大家知，中國傳統太極一啲都唔老土，仲好適合年輕人。唔怪得之黃生喺今年六月初，都收咗位靚女港姐袁嘉敏為徒弟，據聞黃生覺得呢位徒弟骨格精奇，加上甚有香港女性勤力嘅特色，先有呢個決定。
美聯logo玩crossover
黃生今次特邀新徒弟做廣告女主角，都係想趁勢糾正時下年輕人嘅理財心態，唔好以為西方嚴謹分析之道啱晒，佢強調東方經世濟民嘅理念都好重要，尤其係太極隨遇而安嘅傳統生意智慧，所以新廣告特別用咗太極標誌，不過就改用代表美聯及美聯金融嘅黃色及藍色，呢招中西合璧果然有心思。
余絲韻