舊年升岡國際（00485）攞咗寶麗萊美加嘅代理權嚟做，仲有天后級人物Lady GaGa嚟做代言人同創意總監推出三樣產品，各位GaGa粉絲等新產品真係等到頸都長埋。主席劉錫康話個好消息畀大家知，Lady GaGa設計嘅第一款產品Printer已經喺六月份於美國面世，而第二款產品即影即有相機就會喺十、十一月推出，仲對呢個產品好高期望。
劉主席話美國經濟差過預期，個Printer嘅反應只係OK，好似大家對Lady GaGa嘅產品都唔係咁大興趣，不過公司對即將推出嘅即影即有相機就好有信心啦，呢個係數碼即影即有相機，結合咗傳統同創新嘅產品，加上臨近感恩節同聖誕節，銷情應該會幾理想，第三款眼鏡相機就要到明年先推出。劉主席又講，一向有意發展內地市場，但當中銷售渠道較分散，希望今年內合作有啲眉目。
劉錫康嘅另一個身份係馬主，名下嘅「蝦王」系列戰績彪炳，劉主席話自己嘅馬已經退晒役，依家係迎接十月中由澳洲運到嘅新馬，個名仲未定，但應該都係延續「蝦王」傳奇，估計呢隻馬最快十二月底出賽，喺澳洲都贏過兩場，加上又係自己親手配種嘅，所以對呢位新成員期望好大。隨着馬季開鑼，劉主席話自己都會忙啲，不過嚟緊個中秋節都會返屋企食飯，實行「人月兩團圓」！
余絲韻