絲絲講場：證監阻大鱷隨時救咗佢
大家細個可能都聽過，「你咪阻住我發達」呢句台詞。勢估唔到今時今日，可能有人係感激人哋「阻住佢發達」。絲絲講緊嘅，其實就係日前爆出被證監會「阻住發達」嘅摩根大通前炒手Carl Huttenlocher。
聽人哋講，阿「黑松露茶」（Huttenlocher）被匿名信告發，佢曾經喺後海嘯期間，涉嫌不正當咁評估資產。證監會仲講到明，話已經展開調查，搞到呢杯「黑松露茶」喺三月辭咗摩根大通份工，諗住今年九月就開始自立門戶搞基金，到九月過咗一個禮拜都未發到牌。
神級人馬紛紛出事
「黑松露茶」講明扮黃大仙，做到「有求必應」。成件事表面睇嚟，完全係「阻人發達」嘅典型例子。
但絲絲掉轉頭諗，其實又未必喎。大家試諗諗，今年三月到九月，個市咁詭異，連「賺錢之神」、「歐洲股神」等等嘅神級人馬，都紛紛輸到要「認錯」。依家「黑松露茶」個基金愈遲搞得成，可能就愈方便佢喺低位掃貨，真係不妨「再阻一會」嘞，一個唔覺意仲係「逼人發達」添。
余絲韻