員工係公司嘅重要資產，所以好多企業都同員工分享成果，畀番啲適當嘅回報佢哋，但有另一啲方法可以令員工更投入、更忠心。尋日絲絲同國泰航空行政總裁史樂山傾開，佢哋計劃搵員工做廣告主角，絲絲覺得呢個方法幾好，起碼角色扮演方面一定係合適人選，唔會揀錯角。
史樂山話，新嘅市務廣告以員工為「公司珍貴資產」作重點，所以用埋員工做廣告主角。其實呢個方法，其他企業都用過，例如用喺公司印製嘅月曆、慈善活動嘅宣傳單張，效果相當唔錯。史樂山話，呢個廣告好快會喺世界各地推出。如果絲絲冇估錯，佢哋搵嘅主角人選，應該嚟自唔同國家，咁至代表到佢哋嘅業務嘛。佢哋嘅員工好多都係靚仔靚女，真係大把有得揀。
除咗忙於搞廣告之外，國泰嚟緊仲有乜嘢大計？佢一輪嘴咁話，包括搞好新客艙產品及航點、標價2,000億元嘅機隊現代化計劃，未來十年將會引入95架更具燃油效益嘅新飛機，仲有香港國際機場斥資55億元興建新貨運站等。聽落真係好長遠嘅計劃喎！佢哋早輪公布咗，會喺明年第二季起為國泰長、中途客機上，增設「特選經濟客艙」嘅計劃，史樂山叫絲絲記得到時試吓。
余絲韻