絲絲講場：朱泰和：上司關愛最減壓
講起保險營業員，大家都會諗起要努力「跑數」，壓力可謂相當大，咁擁有全港最龐大營業團隊嘅友邦香港，又點幫員工減壓呢？友邦保險集團（01299）執行副總裁朱泰和（John）就話，上司嘅「關愛」係最佳方法。
跑數壓力變動力
究竟關愛嘅力量到底有幾大呢？做過中學校長嘅John，就好數量化咁樣解釋畀絲絲聽，假如員工有90分嘅壓力，如果有上司同埋同事嘅關愛，壓力就可以即刻跌去10分，剩低嗰10分，就要靠家人、朋友嘅幫手，而且呢10分壓力，話唔定可以轉化為工作動力。
絲絲覺得，因跑數而產生嘅壓力，都可以轉化為跑數嘅動力，難怪上半年友邦業績咁標青。
鼓勵員工做運動
其實，友邦都好注重員工嘅身心健康，John話，友邦特登係司徒拔道嘅辦公大樓，劃咗啲地方，整咗個健身室，鼓勵員工工作之餘，都不忘做運動。
佢哋更設立咗個積分榜，最活躍參與嘅員工更有獎勵添。喺公司大力鼓勵下，無論返工前抑或放工後，甚至午飯時間，John都見到唔少同事走去健身。
聽完之後，絲絲覺得佢為咗員工嘅健康，真係好揼本。司徒拔道雖然未至於甲級寫字樓咁貴，健身室嘅佔地，分分鐘夠間小企業用，租金都唔少。
余絲韻