亞洲區股市昨日一如所料低開，但恒指失守19,700至19,800點支持位居然毫無彈力，表現令人失望。中海油（00883）受海外油田停產消息打擊，股價急挫逾8%，兩隻龍頭水泥股中建材（03323）及海螺（00914）同跌逾8%，真係小股災咁款。執筆期間歐洲股市急挫，睇嚟今日港股要繼續探底。
尋日能逆市上升嘅股份唔多，中資股方面，有圖有勢提及嘅大唐發電（00991）股價上升0.42%，收報2.4元；至於股仔中盈國金（00766）最後收報0.201元，升2%。
查實古晨喺八月廿三亦曾提及中盈國金交投有異動要(目及)實，八月底其股價單日以大成交由低位0.161元抽上0.2元，現價仍守得住喺0.2元，表現比想像中強。之不過，畢竟係股仔一隻，亦唔知背後係咪仲有古仔跟尾，炒賣宜注意風險。股價繼續企穩0.2元嘅話，作為短線操作參考，下一阻力位喺七月下旬高位0.219元，向下宜守0.19元。
古晨