市場熱線：市況未明暫宜忍手

滬綜指跌近2%創13個半月收市新低，美股尋晚雖然冇市，但標普期指亦跌近10點，德法魚缸跌3%。距離「歐美重要星期四」仲有3個交易日（到周四晚先知結果），古勝較在意德國法院裁決（打救希臘是否違憲），至於奧巴馬就唔慌有驚喜，政府一面炒人魷魚一面話刺激就業，真係一場政治騷，企業見前景好有錢賺自然會請人，否則你跪地下拜都冇用。仲有半個月先到聯儲局議息，三日內恒指可能已穿底，推QE3又如何？

內房企業嚴重缺水

滙豐中國八月服務業PMI跌到50.6歷史新低，香港八月PMI更大跌到47.8，經濟情況有幾差唔使多講。今日賣地，之前九肚山同油街係豪宅地又多多限制，但今次將軍澳如果都係賣得差就冇藉口，擺明本地地主都唔睇好樓市。「大淡友」謝國忠話香港樓價必冧5成，呢排大淡友又成為追訪明星，之前則被人鬧足兩年。

祖國樓市亦逐漸危危乎，天譽（00059）向建銀基金發債券，有擔保有抵押，但兩年期都要20厘息，證明內房缺水幾嚴重。尋日包括保利香港（00119）同埋花樣年（01777）幾隻內房股創52周新低，但恒盛（00845）創新低後倒升。今次內房下跌唔係因為阿爺出招打壓，而係孖屐缺水，所以就算博都要搵龍頭股，嗰啲要用十幾廿厘息借錢公司搵你愛。

內房股唔掂，水泥股尋日更加係重災區，普遍跌8至10%不等，但瑞銀仍叫人買山水水泥（00691），目標價畀到15蚊。前排中建材（03323）被大孖沙唱到識飛，唔少人中伏，水泥股踏入旺季竟然降價的確幾擇使。踏入旺季嘅仲有航運股，波羅的海乾散貨指數由低位回升5成，但經濟前景一片迷濛，BDI升極都冇用。煤炭股到秋冬亦會係旺季，呢類股會較穩陣，低位尚可一博。

尋經濟不景受惠股

講起煤，不得不提電力股，尋日算係表現較突出板塊，古勝尋日已講，電荒搞到電廠可以大大聲重提煤電聯動，而發改委今年已多次提過水電油氣價格改革，水費同電費都將會有機會落實階級收費，短炒電股之時亦可以順便留意埋中國水務（00855）。

恒安（01044）仍逆市升0.5%作為尋日唯一上升大隻佬，好多20倍PE樓上嘅股都被洗倉，但又唔可以一竹篙打晒一船人，古勝上個禮拜講恒安同維達（03331）時講過，就算經濟唔好都要用衞生巾同廁紙。同樣道理，快餐店股通常亦係逆市奇葩，少人出街娛樂留喺屋企上網會益咗QQ（00700），依家好似講得太早，但講定先都已經差唔多。

尋日又過千隻股票下跌，但創52周新低嘅股票得64隻，即係好多股未穿上月低位，依家不賭是贏錢，股市淡友嘅普遍目標亦只係萬八點，低位冇話冇得博，但起碼過埋呢個禮拜幾單大嘢再睇情況。

古勝