唔知大家係咪都感受到近排，有好多投行都出現人事變動呢？最新鮮熱辣嘅，係美銀美林宣布委任蔡紅軍同王竝（廣東話讀「併」），做公司中國投資銀行部聯席主管。以後佢哋要向美銀美林中國區主席劉二飛報告嘞。
蔡紅軍喺美銀美林做咗超過10年，佢升職前係美銀美林中國投資銀行部副主席。蔡小姐係九三年喺所羅門美邦開始佢職業生涯嘅，做咗呢行18年。
王竝就係○四到○八年喺美銀美林投資銀行部同全球私募股權部做嘢，離職後又喺○九年重投公司懷抱，擔任中國區企業金融部主管。
美銀美林一直好重視中國嘅業務增長，蔡、王二人過去參與好多中國公司嘅IPO、兼併收購以及可轉換債等融資專案，依家升職，美銀美林講明可以確保公司嘅中國業務繼續取得成功。喺度都要恭喜佢哋紮職！
喺今次嘅人事變動方面，美銀美林將中國區主席及投資銀行部主管嘅角色分離，希望可以強化公司整體管理同運作，公司強調劉二飛仲會處理投資銀行嘅重大業務，繼續同客戶和投資者保持緊密聯繫添。
余絲韻