絲絲講場：掟嘉漢陳德源算克制
令「賺錢之神」普爾遜（John Paulson）輸大錢嘅嘉漢林業（Sino Forest），依家相信無人唔識。而董事長陳德源仲被加拿大監管機構勒令「自動辭職」，成為眾矢之的，但從加拿大監管機構嘅文件睇到，佢參與公司股份買賣嘅數量低過其他人好多。
嘉漢係畀Muddy Water踢爆誇大資產，上個禮拜已經停咗牌，依家連子公司綠森（00094）都畀香港證監會要求停埋牌，但兩公司嘅問題應該不同。
加拿大監管機構披露咗一份文件，顯示嘉漢一班高層，喺過去4年嘅售股紀錄。唔睇真係唔知，畀監管機構勒令離職嘅4名行政人員，過去4年合共售出總值約1,188萬美元嘅嘉漢股份，當中陳德源只佔約307萬美元。
另一創辦人沽得最狠
反而，沽得最「兇狠」嘅，就係與陳德源一齊成立嘉漢嘅Kai Kit Poon，過去4年總共售出總值約3,400萬美元嘅股份；其次則要數嘉漢嘅財務總監David Horsley，售股總值係1,150萬美元；再其次係身兼多家公司非執董職位嘅馬世民（Simon Murray），共賣股約1,100萬美元。
監管機構披露嘅文件，同嘉漢發生嘅問題有冇關係，絲絲真係不得而知，淨係知道呢件事有排搞。
余絲韻