今年至喺香港上市嘅嘉能可（00805），遇着金融市場動盪，股價唔多靚仔都冇辦法，可能個價真係好抵，李寧少少哋吸納股票以示支持。大家唔好誤會，此李寧並非體操王子、李寧（02331）董事長嘅李寧，而係恒地（00012）主席「四叔」李兆基嘅大女婿李寧，佢依家都係嘉能可嘅獨立非執董。
嘉能可上市嘅時候好巴閉架，擁有好多知名投資者，其中一個係四叔李兆基，佢嘅女婿李寧仲入咗去做董事添，公司尋日公布，李寧前日買入咗6.2萬股嘉能可股份，每股作價48.87元，總共三百幾萬，尋日個價升番上五十蚊樓上，李寧之前並冇持有嘉能可股份。
李寧好少做上市公司董事，記憶中除嘉能可之外，就只有恒地。唔講唔知，原來李寧與嘉能可行政總裁Ivan Glasenberg ，喺八十年代加州讀書時曾是同學，唔知係咪咁，所以拉埋佢入嚟幫手。
李寧嘅妻子李佩雯，係四叔嘅大女，四叔喺自傳入面透露過，李寧最佩服岳父嘅胸襟，四叔對員工寬容愛護，從來不罵員工，喺九七亞洲金融風暴期間，寧願安排一些部門由六天改為五天工作，減少用水、用電，也要保障員工安居樂業。
余絲韻