市場熱線：中化肥睇位走番轉

總之，八月係先苦後甜，恒指唔見接近2,000點，二三線股更加重創。不過，呢幾日劫後餘生又突然患咗失憶症，隔晚明明美國消費信心暴跌，建行（00939）被美銀賤售，祖國再抽緊銀根，QE3只係挾上嘅藉口，正如孖屐冇乜解釋理由嘅時候，就會用資金流入或流出去交差。

大孖沙同樣頻損手

債王格羅斯旗艦基金因為睇錯市，賭美債跌最後卻大升，今年在589隻債券基金排名中，排501位，早兩日終於出嚟認低威承認睇錯；而保爾森直頭係火燒連環船，先後揸重嘉漢林業、美銀美林及惠普，統統是山泥傾瀉級別的弱勢股，單是八月基金就輸近兩成二，連這班大孖沙都搞成咁，作為散戶，只能盡量做到持盈保泰，市況唔明朗就減少入市，或者趁機買高現金流高息的股份自保。

恒安（01044）業績後有大行唱好，升超過4%；反而招商局（00144）有大孖沙唱淡，逆市跌5.5%。大行喺資訊上有優勢，但亦不能盡信，尤其呢排放榜期近尾聲，自己做多啲功課重整投資組合，古勝認為後市揀股要較着重基本因素，PE20倍以上嘅股要諗過度過，而消費股仍係受歡迎，英皇鐘錶（00887）話咁快又重返高位。

今日係內地同胞減稅嘅大日子，在下亦講過幾次，減稅當然有利消費股，有6,000萬人逃離稅網，月入1萬樓下嘅中產亦交少啲稅，雖然每月普遍慳番幾百蚊唔算多，但都夠買件衫買對鞋或出街擦番餐。

尋日低殘股大翻身，思捷（00330）、比亞迪（01211）、環能（01102）、蒙能（00276）、李寧（02331）等威番日，但沽到殘總有原因，呢類股應該趁反彈沽貨。

另有類股係原本擔心成績表令人大失所望，結果原來又唔係咁差，昂納光通信（00877）連續兩日大升，中化肥（00297）亦係一樣，業績前「高佬盛」同花旗一齊叫沽，公司上半年賺多46%其實同預期差唔多，但大行轉軚最快，「高佬盛」即時剔出售名單，大摩調高評級至增持，交銀亦調高至長線買入。

祖國話通脹已見頂，實情係糧食價格仍不斷加價，食用油又加、白酒又加，但菜價貴肯定刺激化肥需求，所以化肥業喺淡季亦反常漲價，發改委之前公布七月份化肥價格，其中氮肥按年升29.9%、磷肥升17.3%、鉀肥升11.2%。照咁睇，應該買產銷尿素嘅中海石化（03983），中期業績又好，古勝亦喺上月中曾經推介。不過，對比番中海石化同中化肥呢幾個月嘅表現，反而中化肥有追落後嘅價值。

控制成本提升盈利

中化肥嘅股價前排跌到阿媽都唔認得，一穿咗3蚊嘅重要支持位之後，最恐慌嗰日連兩蚊都穿埋，尋日上返2.42元，但距離52周高位仲差一半。講基本因素冇乜問題，而成績表最突出之處係控制成本見效。大摩話新管理層着重提升盈利而非銷量，重整分銷中心之後，料毛利可重上金融海嘯前水平。交銀亦話中化肥有機會超越○八年嘅每股盈利0.27元人仔，所以值得博繼續反彈，3蚊個位可能已由支持位變阻力位，短線可以等2.8元或2.9元食胡。

古勝