作為金融投資界嘅活躍分子，到星期五，Prof. J多數以活力形象出席不同「快樂時光」，一來輕輕鬆鬆減減壓。另外，梗係擴大行內人際網，左聽聽，右聽聽，為大家獻上一手資料。講開飲啤酒，Prof. J喺內地幾時都支持國貨。全國內地啤酒選擇極多，除咗全國品牌之外，每個省亦有唔少品牌，競爭可謂相當劇烈。
金威啤酒（00124）早一個月發盈警，中期一出，盈利急跌84%，都咪話唔厲害。睇番上半年，做成9億幾生意都可以冇錢賺，都咪話唔奇。正所謂魔鬼在細節，盈利急跌除咗要交稅又要交教育附加費用之外，成本上漲先至恐怖。一睇就知係間公司喺成本對沖上出現極嚴重問題，行業競爭難做就肯定係，但公司管理層的不是正正係突出公司嘅核心能力盲點所在。
金威係走平價路線，要成功，一定要喺卓越營運（Operational excellence），同埋一定要以量取勝。另外，金威當然可以「往上爬」，透過創造全新品牌來打出一片藍海。
想起當日，華創（00291）都想收購喜力手上21%金威權益，點知粵海先下手為強行使優先權，令持股量增加到73%。回頭睇，華創今次真係最威，加上不斷收購不同內地啤酒品牌，高中低檔次全部歸位，睇怕今次真係粵海失威，華創至威就真。
香港大學電子金融服務榮譽助理教授 徐燦傑