絲絲講場：黃遠輝與赤柱淵源深
仲有兩日就開始榮休既工銀亞洲董事兼副總經理黃遠輝，個個都知佢英文名叫Stanley，查實佢好傳統，一直都冇幫自己加個英文名，直至入咗外資行做嘢，喺徇眾要求下至整番個。
喺做外資行嘅時候，外籍同事叫佢做「Wong」，不過話晒姓黃都係百家姓之中排頭五名啊，一叫阿「Wong」，分分鐘成村人會應，仲好易搞錯啲嘢，於是佢班外國同事就叫佢改英文名啦。
「是但你」夠隨和
話改就改，改乜好呢？佢班同事就話平日放假都好鍾意去赤柱玩，而赤柱嘅英文名就係Stanley，咁就變左佢個英文名啦，仲有個中文版，叫「是但你」喎。Stanley仲加多句，其實我份人都幾隨和。
Stanley話，呢排整緊啲相同埋寫嘅感想放係隻USB手指度送畀同事，發現咗有張佢好耐之前喺端午節扒龍舟時打緊鼓影嘅相，睇吓睇吓先發覺個龍頭寫住Stanley，搞到成隻私家龍舟咁。其實只係嗰日佢喺赤柱扒龍舟，梗係寫住赤柱所有啦。
余絲韻