市場熱線：上海石化雙底回升

今個禮拜暫時要睇住美國經濟數據先，而上個禮拜突然傳德國3條煙不保，照計德國真金不怕洪爐火，空軍咁做都係試水性質，但竟然DAX嚇到大跌，證明乜嘢叫人心虛怯，空軍隨時會發動總攻勢，穩陣股友最好靠邊站，所以尋日成交再縮到得532億元，恒指升282點只係乾升，咁細成交再挾上兩萬點樓上唔係難，古勝會選擇忍手。

內銀H股升因牽強

港股尋日離奇在靠內銀股挾高，傳聞美銀將沽貨嘅建行（00939）升近5%，工行（01398）同中行（03988）亦分別升3.25%同2.65%。人行證實改變RRR計算公式，等同變相加兩至三次RRR，有人話調整之後唔使再驚加息，但內銀H股升因仍好牽強，滬綜指就被內銀A股拖累而跌1.37%。今次收水，細錢莊會較受影響，民行（01988）大跌6%，但做中小企放水生意嘅中國信貸（08207）乘勢上升6%。

太保（02601）業績好，更顯得國壽（02628）特別差，結果國壽再插3.44%，隻股愈插就愈多ELN接貨，形成惡性循環。尋日雖然係升市，但仍有超過400隻股票下跌，77隻股票創52周新低，有啲公司愈睇愈傷心，例如霸王（01338）同金風（02208），但後者A股仍高過H股兩倍幾價錢！飛克（01998）同博士蛙（01698）亦喺派完成績表後暴跌，呢幾隻都係近兩年上市嘅股票，古勝成日話近年至上市嘅公司多數係籮底橙，呢樣可以用成績表去印證。

中石化（00386）業績後勁升6.7%，上海石化（00338）同儀征（01033）亦升超過5%，兩個仔幾時私有化講咗咁多年，等到頭髮變白都未得，不如睇番佢哋嘅基本因素仲好過。上石同儀征往績PE都係6倍，前者倒退、後者有增長，好似儀征抵買啲，但儀征業績好係因為棉花價格高帶挈，呢支歌仔下半年已冇得唱。上石雖然賺少6%，但隨住油價回落，煉油業務嘅毛利率有望改善。

間中炒番轉私有化

國際油價喺第二季曾升至過百美金一桶，但中央一味加慢減快，搞到煉油業蝕大本，依家油價回復正常水平，上石下半年應有望回復增長。而隻股有另兩樣催化劑，一樣係講咗好耐嘅成品油定價機制改革，另一樣係私有化，私有化一路煲冇米粥，但隔一排就攞出來炒一炒。上石喺舊年二月同五月都曾跌到過2.6元附近之後回升，今個月亦係下試呢個位然後反彈，最主要原因係PB低過1倍就有人憧憬私有化，既然有個「底」，買入都唔使心慌慌！

古勝