上星期，副總理旋風式訪問香港，為阿爺送上多份厚禮，仿似中國的QE為港股添上動力，可惜外圍市況不佳，令到「大禮變小禮，股市無力繼」，真係無癮。不過如果有追開我嘅專欄，AMS3.8、外匯管制、送大禮，時間性上一致脗合，只等待一個新的觸發點。哈！又繼續等，無計！
近排，股壇金手指—─惠理（00806）出業績，最強嘅收入來自於表現費，令到成個基金界大家口水都流晒出來。大家都知，表現費成為咗基金經理一個好重要嘅收入指標，搵錢嘅原動力，搞到我Prof J都要落場走一轉，向資產管理進發，如果講佢哋嘅王牌基金揸貨五年有一倍回報，真係非常之唔錯，亦都叫做有交代。
惠理依家畀人睇低，係因為佢近期都開始「傷亡慘重」，沽貨嘅有，停牌嘅又有，睇好係佢識得搞ETF呢瓣，亦都食住呢期李克強光環效應下嘅條件，陣式上可以睇高一線。
雖然近期佢嘅基金贖回潮有增長現象，不過我覺得「揸貨五年，一倍回報」，鎖定利潤先走一轉亦都係合情合理，問題在於佢有無新嘅大計，新嘅投資理念同策略，先係大家更加留意同關注要點。買一間公司，係買佢嘅動態力（Momentum），不如大家睇吓惠理又可唔可以乘風破浪，再創高峰！
香港大學電子金融服務榮譽助理教授 徐燦傑