易運錢：天能動力可追落後

比亞迪（01211）中期純利倒退九成兼發盈警，股份捱沽不在話下，仲連累股神個金漆招牌都「揩花」埋。反而超威（00951）中期盈利錄得兩成增長，股價昨日急升12%，並帶動一眾電池股做好。

但單睇電池業務，比亞迪毛利率急跌14個百分點，至10.9%，相反超威毛利率就從26.6%升至30.2%，一係兩者經營能力上有分野，不然就係超威主力發展嘅電動自行車市場真係好好景，若果係後者，天能動力（00819），就大有留意價值。

講到天能，近期嘅遭遇可謂大起大落，先係月初內地大力整頓鉛蓄電池行業，旗下廠房因而停產，股價曾單日急挫13%並停牌，不過隨後市場解讀中央收緊監管，提高行業門檻，股價迅速回升並創出5.1元新高，早幾日至跟隨大市回落，昨日又升3.4%，收報4.48元。