本地最大證券經紀組織嘅證券業協會，尋日召開會員大會同進行主席改選，一如市場所料，副主席馮煒能順利接替李耀榮，當選新一屆主席，九月一日正式生效。
馮煒能係嘉信控股董事及總經理，佢喺證券業協會服務多年，但為人較為低調，外界對佢認識不算深。
證券業協會一向都有三名副主席，除原有嘅招商證券董事繆英源、同東英亞洲證券董事陳立德之外，東盛證券嘅張為國亦新加入成為副主席。
大家絕對不可忽視副主席嘅安排，因為根據該會過往嘅慣例，主席個位一般都係由副主席升任，因此邊個做副主席，隨時有機會係主席嘅明日之星！
證券業協會主席嘅任期係兩年，二○一三年到期。絲絲相信馮煒能當選後，一定好唔得閒，事關最近中央落實多項金融政策，好似「RQFII」就令內地在港券商/基金公司有更多機會；人債發行又益咗銀行有大把生意做；「小型港股直通車」係咪可以帶旺香港個市，依家係未知之數，對本港中小經紀直接利益仍有待時間證明。
余絲韻