市場熱線：青蛙王子值得憧憬

沽空金額上周五爆燈之後，連續4日顯著回落，港匯亦返到7.95水平，空軍好似暫時收手，其實「輸家食尾胡」係常見現象，古勝早幾日亦提出此點，只係前日個市太肉酸令到信心有動搖。既然呢排個市好似賭大細，不如揀啲業績股搭吓順風車好過，橫掂呢排業績股有翻生迹象。

聯通業績算有驚喜

大隻佬家陣郁吓都一成上落，前日國壽（02628）大跌，尋日聯通（00762）大升12.2%，連帶電訊設備股亦炒埋，京信（02342）同星辰（01155）業績報喜，但連中興（00763）都升7.3%。聯通第一季賺少九成，但半年只係賺少9%，搞到分析員跌晒眼鏡。聯通老總話同「哎瘋」有美好嘅過去，所以亦會有美好嘅將來，但似乎祖國移動（00941）同中電信（00728）都想爭食喎，所以聯通咪咁老定，隨時會有第三者。講開「哎瘋」，「教主」正式辭職，谷歌買摩記之後競爭力大增，蘋果公司未必再可以獨大。

國壽H股繼續跌3.8%收報19.52元，但A股已回升逾3%，A股由折讓一成以上變成有溢價。國壽fans眾多，所以值得講多兩嘴。其實公司前景唔係咁差啫，今年銷售渠道由銀行轉去經紀有過渡期，隻股仍值得長線投資，只係股東要捱吓價。滬綜指尋日升3%，A股連日跑贏港股，唔單止國壽A股變溢價，幾隻內銀股已係A貴過H。

燃氣股亦有好表現，華潤燃氣（01193）創新高，但北控（00392）卻一路都跑輸畀同業股，所以都唔好對下周三派嘅成績表期望咁高。市況一好番啲，孖屐又炒番啲業績股，炒業績要睇之前走勢，好似華晨（01114）已升咗咁多反而有獲利回吐，國藥（01099）之前跌得多所以一彈就15.7%。

炒業績亦可以留意吓青蛙王子（01259），青蛙不愧係兩棲動物，上市後一時潛水、一時浮水，尋日收報2.3元，較招股價2.6元仲係潛緊水，但喺咁弱雞嘅市況已唔算差，畀個市咁樣chok法，想唔貨源歸邊都幾難，幕後人士一係接貨、一係先行散水，睇走勢好似仍有期待。

青蛙仔招股時預測上半年會賺唔少過6,770萬元人仔，以舊年賺1.44億人仔計，預測相當保守，通常亦會留水位畀股東高興吓。隻股現市值得23億元，就算計下半年冇增長，佢一一年PE亦唔夠14倍。而坊間全年盈利預測由1.8億至2億幾人仔不等，又用保守條數計，預測PE應該10倍咁上下。

主打兒童護理產品

集團係做兒童用品市場，但唔同博士蛙（01698）賣衫，而係賣護膚、洗頭水沐浴露、口腔護理、尿布等護理必需品，主攻三四線城市，然後目標去一、二線城市挑戰寶潔。青蛙要變王子，萬變不離其宗要睇盈利增長，下個禮拜二派成績表係第一關。

古勝